Presidenti turk Rexhep Tajip Erdogan dhe lideri rus Vladimir Putin do të fokusohen në marrëveshjen e grurit ukrainas gjatë një takimi të planifikuar me 4 shtator, transmeton Kosova Post.
Kështu deklaroi të dielën, më 3 shtator, këshilltari i Erdoganit për politikë të jashtme, Akif Cagatay Kiliç.
“Ne shohim mbështetje të fortë nga e gjithë bota për realizimin e korridorit të grurit,” tha ai.
Siç tha ai, Ankaraja pranoi komplikimet teknike që lidhen me marrëveshjen, veçanërisht në lidhje me grurin dhe mekanizmat e pagesave ruse.
“Problemi përfshin gjithashtu sistemet ndërkombëtare të pagesave si SWIFT, i cili paraqet një sfidë të shumëfishtë,” shtoi Kiliç.
Rusia dhe Ukraina janë eksportuesit kryesorë të grurit dhe marrëveshja e tyre fillestare ndihmoi në uljen e çmimeve globale të ushqimeve, të cilat janë rritur që nga fillimi i pushtimit rus të Ukrainës në shkurt 2022, duke shkaktuar urinë në Afrikë dhe pjesë të Lindjes së Mesme.
Turqia, së bashku me Kombet e Bashkuara, ndërmjetësuan në korrik të vitit të kaluar një marrëveshje që lejonte Ukrainën të dërgonte grurë dhe ushqime të tjera nga tre porte të Detit të Zi.
Moska e hoqi atë marrëveshje muajin e kaluar, duke përmendur dështimin e saj për të respektuar dispozitat që synojnë lehtësimin e eksporteve ruse të produkteve bujqësore dhe plehrave.
Rusia që atëherë ka nisur sulmet ndaj infrastrukturës portuale të Ukrainës dhe ka paralajmëruar se mund t’i konsiderojë të gjitha anijet në Detin e Zi si objektiva ushtarake.
Marina ruse hapi zjarr dhe për pak qe nuk e fundosi një anije në pronësi turke që hyri në Detin e Zi në fillim të këtij muaji.
Ukraina tani është e varur nga rrugët tokësore dhe një port lumor që kufizon rëndë vëllimin e saj të eksporteve të grurit.
Në mëngjesin e 3 shtatorit, dronët rusë goditën infrastrukturën portuale në lumin Danub, e cila është vendimtare për eksportet e grurit të Ukrainës. Të paktën dy persona u plagosën në sulmin në pjesët jugore të rajonit të Odesës, thanë zyrtarët ukrainas.
