Situata me zjarret që mbeten jashtë kontrollit në Shëngjin vijoi të martën pasdite të përkeqësohet, duke u përhapur pranë zonave të banuara e duke vënë në rrezik jetën e banorëve.
Gazetarja Lusi Përgjegji raportoi për RTSH se ndërhyrjet nga ajri e toka nuk arritën të shmangin vatrat e papritura, të cilat arritën deri në hapësirën e plazhit të një rezorti turistik.
Flakët përfshinë shezlongët prej kashte, ndërsa për shuarjen e tyre po ndihmojnë banorët, zjarrfikësit dhe punonjësit e emergjencave civile. Një objekt pranë plazhit po ashtu u shkrumbua nën të njëjtat kushte: dyshohet prej ashklave të ndezura të transportuara përmes ajrit nga vatrat aktive.
Perimetri i vatrave të zjarrit që digjet prej 24 orësh ka vijuar të zgjerohet duke u shoqëruar me panik mes banorëve.
Një vatër e re në anën e malit, po ashtu e pasuruar me pyje, u përhap me shpejtësi në zonën e rrugës Shëngjin–Velipojë.
Prej mëngjesit të sotëm rreth orës 07:00 ka nisur ndërhyrja me helikopter nga ajri.
Për shuarjen e flakëve po punojnë rreth 80 forca zjarrfikëse nga Lezha, Mirdita, Kamza, Tirana e Berati Fieri, Lushnja, Vau i Dejës dhe Shkodra./rtsh
