Shteti zhvilloi aksion policor sot me mëngjes në Kaçanik. Cak ishin personat e dyshuar për vrasjen e rreshterit policor Muhamed Lika, para rreth 1 muaji.
Dy persona dyshohej fillimisht se e kryen krimin, ndërsa operacioni i sotëm i Policisë në koordinim me Prokurorinë Themelore në Ferizaj çoi në arrestimin e rreth tetë personave.
Akoma nuk dihet roli i secilit prej tyre në ekzekutimin e policit kosovar, por që hetimi rezultoi me identifikimin dhe arrestimin e tyre.
Në këtë aksion po marrin pjesë rreth 350 policë, raporton Sinjali, ndërsa kontrollet po vazhdojnë.
Për të dhënë detaje, Prokuroria Themelore ka thirrur konferencë me fillim nga ora 11:30.
“Pjesëmarrës në këtë konferencë do të jenë Kryeprokurori i Prokurorisë Themelore në Ferizaj, z.Burim Çerkini dhe Drejtoria Rajonale e Policisë së Kosovës”, thuhet në njoftim.
Po ashtu në këtë konferencë do të marrë pjesë edhe drejtori i Përgjithshëm i Policisë, Gazmend Hoxha.
