Më shumë se 5.2 milionë pishina sipërfaqësore të shitura në SHBA dhe Kanadë gjatë dy dekadave të fundit janë tërhequr nga tregu pas raportimeve për nëntë vdekje nga mbytja.
Tërheqja përfshin një gamë pishinash nga Bestway, Intex Recreation dhe Polygroup, të cilat janë shitur nga tregtarë të mëdhenj që nga viti 2002. Sipas njoftimeve të publikuara të hënën nga Komisioni i Sigurisë së Produkteve Konsumatorë të SHBA-së (CPSC) dhe Shëndeti Kanada, këto pishina kanë rripa kompresioni përgjatë pjesës së jashtme të produktit – të cilët “mund të krijojnë një mbështetje për këmbë” për fëmijët e vegjël dhe t’u lejojnë atyre të hyjnë në ujë pa mbikëqyrje, shkruan Associated Press.
Kjo paraqet një rrezik serioz për mbytje, paralajmërojnë rregullatorët e sigurisë. Deri më tani, CPSC beson se nëntë fëmijë në SHBA janë mbytur pasi kanë arritur të hyjnë në këto pishina tërhequr nga tregu në këtë mënyrë. Këto vdekje kanë ndodhur midis viteve 2007 dhe 2022, duke përfshirë fëmijë nga mosha 22 muajsh deri në 3 vjeç. Nuk janë raportuar viktima shtesë në Kanadë.
Konsumatorët që posedojnë këto pishina inkurajohen të kontaktojnë menjëherë Bestway, Intex dhe/ose Polygroup për të marrë një paketë falas riparimi – e cila përfshin një litar për të zëvendësuar rripin e kompresionit. Pronësit e këtyre pishinave duhet të sigurohen që fëmijët e vegjël të mos kenë akses në pishinë pa mbikëqyrje ose të zbrazin pishinën deri në kryerjen e riparimit, sipas rregullatorëve.
Të gjitha pishinat që po tërhiqen janë të larta 48 inç ose më shumë dhe mund të identifikohen sipas emrave të markës dhe modeleve që janë të listuara në njoftimet e tërheqjes nga CPSC dhe Shëndeti Kanada. Shitjet e këtyre pishinave ndryshojnë sipas modelit dhe vendndodhjes, por datojnë që nga viti 2002 deri në vitin 2025.
Rreth 5 milionë nga këto pishina janë shitur në SHBA – përfshirë shitjet online dhe në dyqane të mëdha si Walmart, Target, Lowe’s, Costco dhe Amazon. Një tjetër 266,000 janë shitur në Kanadë./rtk
