Pas letrës së dërguar nga Qeveria e Kosovës në adresë të Asamblesë Parlamentare se do të draftojnë një Statut të ri të Asociacionit deri në fund të majit, një letër tejet e rreptë dhe e qartë për nga qëndrimet i ka ardhur Kryeministrit të Kosovës, Albin Kurti nga tre krerët e shteteve më të fuqishme të BE-së: Franca, Gjermania dhe Italia.
Në rend të parë thuhet se Kosova rrezikon anëtarësimin në Këshill të Evropës nëse nuk ndërmerr hapa drejt Asociacionit, ndërsa propozimi i tij për draftin të një Statuti quhet “i papërshtatshëm dhe i pazbatueshëm” në kontekstin e konsultimeve me kryetarët dhe asambletë e komunave në veri pa legjitimitet politik.
“Veprimet dhe vendimet tuaja në këtë moment kritik do të jenë vendimtare për aspiratat e Kosovës për anëtarësim në Këshillin e Evropës. Topi është në fushën tuaj. Ne besojmë sinqerisht në udhëheqjen tuak”, i thanë tre krerët e shteteve evropiane Albin Kurtit.
“Fatkeqësisht, hapat që ju propozoni nuk adresojnë nevojën urgjente për hapa vendimtarë drejt krijimit të A/CSMM-së dhe rrezikojnë të minojnë më tej Dialogun e lehtësuar nga BE-ja.
Së pari, projekt-statuti i paraqitur nga Përfaqësuesi Special i BE-së për Dialogun, Miroslav Lajçak, nuk është thjesht një “propozim xhentëlmeni”. Është një model…
Së dyti, dorëzimi i këtij drafti tek ekspertët e Këshillit të Evropës nuk do të përbënte një hap të domosdoshëm vendimtar pasi opinioni i tyre nuk do të jetë ligjërisht i detyrueshëm. Kjo mund të arrihet vetëm duke e dërguar atë në Gjykatën Kushtetuese të Kosovës, në mënyrë që të jetë e pranueshme për Gjykatën. Siç u sqarua me Brukselin, nuk ka pengesa ligjore në Dialogun e lehtësuar nga BE-ja për marrjen e këtij hapi.
Së treti, propozimi juaj për përgatitjen e një drafti të ri në konsultim me kryetarët apo deputetët aktualë të komunave nuk është as i përshtatshëm dhe as i zbatueshëm për rrethanat aktuale në këto komuna”.
