Anëtari i Kryesisë së Nismës Socialdemokrate, Vesel Krasniqi i ka quajtur spekulime raportimet në media se tre deputetët e tyre do të votojnë pro formimit të qeverisë Kurti por pa u përfshirë në koalicion qeverisës.
Krasniqi në një përgjigje për KosovaPress ka thënë se për momentin “s’ka asnjë lëvizje” dhe se Nisma mbetet ende në deklarimet e mëhershme të kryetarit Fatmir Limaj.
Pas përfundimit të zgjedhjeve të 9 shkurtit, Limaj në paraqitjen e parë dhe të vetme publike ka refuzuar të vendosë “vija të kuqe” për Lëvizjen Vetëvendosje në ndërtimin e qeverisë së re, duke deklaruar se është i hapur për diskutime për çështje me rëndësi nacionale.
Megjithatë, kreu i Nismës Socialdemokrate, është takuar edhe me liderët e taborit opozitar për mundësitë e formimit të qeverisë nga PDK, LDK dhe AAK-Nisma.
“Ne jemi në deklarimet e zotëri Limajt, .s’kemi asnjë lëvizje për momentin. Këto [raportimet] janë spekulime”, tha ai.
Nisma Socialdemokrate do të ketë tre deputetë në Kuvendin e Kosovës. Ajo në zgjedhjet parlamentare të 9 shkurtit ka garuar në koalicion parazgjedhor me Aleancën për Ardhmërinë e Kosovës(AAK).
Lideri i kësaj partie, Ramush Haradinaj është shprehur kategorik kundër një koalicioni me Lëvizjen Vetëvendosje.
KQZ-ja certifikoi rezultatet përfundimtare të enjten më 27 mars dhe sipas tyre LVV-ja ka fituar 48 ulëse, PDK-ja e dyta me 24 ulëse, LDK-ja 20 dhe koalicioni AAK-Nisma 8 ulëse.
Pra, nevojiten koalicione pasi që asnjëra parti nuk mund ta formojë e vetme qeverinë.
Minoritetet jo serbe i kanë 10 deputetë ndërkaq, serbëve u takojnë gjithashtu dhjetë ulëse në Kuvendin e Kosovës.
Sipas rezultateve, një ulëse e ka fituar politikani serb dhe ministri në detyrë në Qeverinë Kurti 2, Nenad Rashiq, dhe 9 ulëse do t’i takojnë Listës Serbe – partisë më të madhe të serbëve në Kosovë e cila financohet
Ditë më parë, presidentja Vjosa Osmani tha se shumë shpejt do të caktohet data për seancën konstituive të Kuvendit të Kosovës. Afati ligjor për këtë është 30 ditë.
Kryeministri Albin Kurti, gjatë urimeve të festës së Fiter Bajramit të dielën më 30 mars në Bashkësinë Islame, i tha myftiut Naim Tërnava se po synojnë që në seancën e njëjtë kur thirret për betimin e deputetëve të zgjedhin kryetarin e Kuvendit si dhe të formojnë qeverinë e re.
Por, ai nuk bëri të ditur se si dhe me kë do të arrijnë një gjë të tillë./kp/
