Kryetari i Lidhjes Demokratike të Kosovës (LDK) dhe kandidati për kryeministër, Lumir Abdixhiku, ka deklaruar se partia e tij ka arritur një rezultat të mirë në zgjedhjet e 9 shkurtit, duke shënuar një rritje të konsiderueshme në numrin e votave, përcjrll KosovaPost.
“Po, LDK do t’i ketë në fund plot 180 mijë vota. Po, LDK do ta arrijë rreth 20%. Po, ky është rezultat i mirë pas rënies historike,” tha Abdixhiku.
Ai theksoi se ky rezultat është një arritje e rëndësishme për LDK-në, edhe pse partia nuk e fitoi garën. “LDK nuk i ka fituar zgjedhjet, do të donim këtë në veçanti ne, këtë e dijmë, por LDK pritet ti shtojë plot 80 mijë vota; e kapërcimi prej 12 në 20% do të vërtetohet si arritje e jashtëzakonshme,” shtoi ai.
Abdixhiku gjithashtu kritikoi KQZ-në për procesin e numërimit të votave, duke theksuar se nuk është bërë asgjë bazike për të përgatitur zgjedhjet, ndonëse kishte katër vjet kohë. “Kthehuni në metodë klasike aman! Numërimi është ky!” tha ai.
Pavarësisht sfidave, ai theksoi se LDK ka rikthyer veten dhe është e angazhuar për të përmbushur zotimet paraelektorale. “Ky rezultati nuk është rezultat ndryshimi për Kosovën; sepse populli i Kosovës ka tjera preferenca. I respektojmë. Do t’i respektoj këto preferenca sepse nuk di ndryshe!” tha Abdixhiku.
Ai e mbylli deklaratën duke shprehur besimin se Dritë do të ketë sërish. “Le të presim numërimet! Le të ecim drejtë e siç dijmë ne! Dritë do të ketë sërish!” deklaroi Abdixhiku.
