Kreu i Komunikimeve pranë Presidencës së Türkiyes, Fahrettin Altun, bëri thirrje për veprime të menjëhershme për t’i dhënë fund sulmeve të vazhdueshme të Izraelit në Gaza, duke përkujtuar “ditën e 350-të të këtij gjenocidi”, raporton Anadolu, transmeton KosovaPost.
Në një deklaratë të shpërndarë në X, Altun tha: “Dita e sotme shënon ditën e 350-të të këtij gjenocidi. Të heshturit për këtë gjenocid na bën bashkëfajtorë në këtë tragjedi”.
“Për hir të drejtësisë, për ndërgjegjen e njerëzimit dhe për të ardhmen tonë, ne duhet të ngremë zërin dhe të veprojmë menjëherë për të ndaluar këtë masakër”, shtoi ai.
Altun theksoi numrin e lartë të viktimave civile, veçanërisht fëmijët dhe gazetarët, teksa kritikoi shpërfilljen që Izraeli ia bën ligjit ndërkombëtar.
“Qytetet po bombardohen, xhamitë, spitalet dhe shkollat po shkatërrohen. Civilët e pafajshëm, gazetarët, fëmijët, madje edhe foshnjat po shënjestrohen me vetëdije dhe në mënyrë sistematike. Izraeli, duke mos respektuar ligjin ndërkombëtar, po ndjek një politikë presioni dhe dhune kundër burimeve legjitime të informacionit, po vriten gazetarët që përpiqen të informojnë botën për të vërtetën e asaj që po ndodh në rajon”, u shpreh Altun.
Sipas shifrave të shpërndara në video-postimin e tij, konflikti ka rezultuar në mbi 41 mijë viktima palestineze, duke përfshirë më shumë se 16 mijë fëmijë dhe 11 mijë gra. Në video thuhej gjithashtu se të paktën 95 mijë palestinezë janë plagosur që nga fillimi i konfliktit më 7 tetor.
Videoja tërheq vëmendjen edhe për faktin se Izraeli ka vrarë më shumë se 11 mijë fëmijë nën moshën 18 vjeç dhe të paktën 700 foshnja nën moshën një vjeçare në Gaza.
