Një shtetas i Kosovës është ndaluar nga autoritetet serbe në pikën kufitare Mutivodë, teksa po kthehej në Kosovë.
Sipas familjes së tij, ai po përballet me dyshime për krime lufte.
Lajmi u bë publik nga vajza e tij përmes një postimi në Facebook.
Ajo bëri të ditur se bëhet fjalë për Osman Selmanin, i cili, sipas saj, është ndaluar më 1 korrik 2026 dhe aktualisht ndodhet në Prokurorinë për Krime Lufte në Beograd.
Familjarët kanë mohuar akuzat ndaj tij, duke i cilësuar ato si të pabazuara dhe të pavërteta.
“Ne besojmë në pafajësinë e tij dhe do të qëndrojmë pranë tij deri në zbardhjen e plotë të së vërtetës. Kemi besim se drejtësia do të mbizotërojë dhe e vërteta do të dalë në pah. Ju falënderojmë nga zemra për çdo mbështetje, lutje dhe fjalë inkurajuese në këto momente të vështira për familjen tonë”, thuhet në postimin e publikuar nga vajza e tij në Facebook.
