I pari i ekzekutivit, Kryeministri i Kosovës, Albin Kurti ka thënë se Asociacioni ka pengesë kushtetutshmërinë, ligjshmërinë, demokracinë dhe jo vetëm Kryeministrin. Lidhur me këtë çështje, ambasada e SHBA-së në Kosovë do të organizojë një diskutim për të cilin Kurti ka thënë se nuk ka pranuar ftesë.
Kryeministri i Republikës së Kosovës, Albin Kurti ka thënë se Asociacioni i Komunave me Shumicë Serbe nuk ka për pengesë vetëm Kryeministrin.
Në një intervistë për REL, Kurti ka thënë se Kosova ka nevojë urgjente për njohje reciproke me Serbinë dhe se të gjithë ata që flasin për Asociacionin përderisa Serbia nuk njeh pavarësinë e Republikës së Kosovës, e ndihmojnë atë.
“Nuk mendoj që Asociacioni është thjesht një projekt, i cili ka pengesë vetëm kryeministrin. E ka pengesë kushtetutshmërinë, ligjshmërinë, demokracinë, popullin e Kosovës dhe unë nuk besoj që Kosova e ka nevojë urgjente një Asociacion të tillë. Kosova ka nevojë urgjente për njohje reciproke me Serbinë. Ata të cilët flasin ditë e natë për Asociacionin ndërkohë kur Serbia të thotë se s’të njeh asnjëherë, për besë i ndihmojnë asaj. Nuk është fer [e drejtë] ndaj popullit shumë të vuajtur të Kosovës. Nuk mund të nxirret qerrja para kalit. Njohja reciproke është në qendër. Presidenti [Joe] Biden ka thënë normalizim i marrëdhënieve me marrëveshje që e ka në qendër njohjen reciproke. Është gabim i madh në diskursin politik dhe publik të hiqet njohja reciproke prej qendrës e aty të vendoset Asociacioni, siç po duket që po ngjan. Unë nuk mund ta pranoj këtë. Presidenti Biden ka dhënë udhëzime të tjera dhe ne do të duhej që shtetin tonë, atdheun tonë, ta duam edhe më shumë se presidenti Biden, jo më pak se ai”, ka deklaruar Kurti.
Ambasada e Shteteve të Bashkuara të Amerikës në Kosovës ka konfirmuar diskutimin për Asociacionin e komunave me shumicë serbe që pritet të mbahet më datë 31 janar.
Kryeministri Kurti ka deklaruar se nuk kishte pranuar një ftesë nga ambasada amerikane për diskutimin e thirrur nga ajo.
“Unë nuk jam ftuar në atë takim, por ata që janë ftuar, le të shkojnë në atë takim dhe le ta diskutojnë. Por, po e ritheksoj, nga 33 marrëveshjet e Brukselit nuk bën të zgjidhet njëra sepse nuk ka hierarki. Nuk mund të krijohen hierarki artificiale, përveç rendit kronologjik. Ndërkaq, në anën tjetër, edhe nga propozimi i Bashkimit Evropian nuk mund të përzgjidhet vetëm ndonjë nen, i cili mendohet që e përfshin Asociacionin e komunave me shumicë serbe. Pra, unë besoj që ky takim është pasojë e insistimit të zyrtarit të Departamentit të Shtetit amerikan, i cili është edhe emisar special për Ballkanin dhe i cili ka deklaruar që, pavarësisht kryeministrit të Kosovës, Asociacioni duhet të bëhet. Unë kam pritur që ai në Beograd do të deklarojë që, pavarësisht presidentit të Serbisë, Serbia duhet ta njohë Kosovën në vend se në Prishtinë të thotë, pavarësisht kryeministrit të Kosovës, duhet të bëhet Asociacioni”, ka thënë Kurti.
Deri tani, pjesëmarrja është konfirmuar nga Aleanca për Ardhmërinë e Kosovës (AAK) dhe Nenad Rashiq, ministri për Komunitete dhe Kthim në Qeverinë Kurti.
Ishte 13 dhjetori i vitit të kaluar kur i dërguari i posaçëm amerikan për Ballkanin Perëndimor, Gabriel Escobar ka thënë se Asociacioni do të formohej duke përmendur edhe “partnerët alternative”.
Se kush mund të jenë partnerët alternativë, Kurti ka thënë se do ishte më mirë që për këtë të përgjigjej vet Escobar.
Ishte 20 janari i këtij viti kur i dërguari i posaçëm i Bashkimit Evropian për dialogun Kosovë-Serbi, Miroslav Lajçak pas takimit me Kryeministrin e Republikës së Kosovës, Albin Kurti, i shoqëruar nga emisarët e tjerë ndërkombëtarë ka thënë se ka pritur mirëkuptim të mundësisë që jep propozimi i BE-së, teksa ka shtuar se shpreson të shfrytëzohet potenciali i këtij propozimi.
Ndërkaq, ishte Kryeministri Kurti ai i cili në një intervistë për REL ka thënë se nuk kishte kam thënë diçka që ata nuk e kanë pritur.
“Unë nuk kam thënë diçka që ata nuk e kanë pritur, duke pasur parasysh komentet që ua kam dërguar dhe deklarimet e mia, gjithmonë publike. Tash, nëse kanë pritur diçka më shumë, do të duhej të tregojnë ata. Nga pikëpamja ime gjithçka ka qenë korrekte, në rregull dhe takimi ka qenë shumë përmbajtjesor”, ka deklaruar Kurti.
Tutje, ky i fundit ka thënë se nuk është e drejtë që 33 marrëveshjet e Brukselit të dekadës para ardhjes së tij në pushtet tu krijohet një hierarki.
“Por, së pari unë nuk jam dakord që 33 marrëveshjet e Brukselit të dekadës para se unë të vij në qeverisje, të krijohet hierarki e tyre, sepse nuk është e drejtë. Ato kanë kronologji, por nuk kanë hierarki. I përkasin një rrafshi horizontal që të 33 marrëveshjet e Brukselit dhe nuk mund të bësh zgjedhje duke ndarë marrëveshjet e preferuara për dikë. Dhe, në anën tjetër, nga ato 10 nene të marrëveshjes së synuar nëpërmjet propozimit të Bashkimit Evropian, pra ato 10 nene gjithashtu nuk mund të kenë ndryshim të renditjes në kundërshti me numrat që i kanë fjalitë dhe paragrafët në fillim. Pra, 10 nene kanë numra dhe nuk mund të përzgjedhësh një nen që të preferohet nga ndonjë palë dhe as nuk mund të përzgjidhet ndonjëra prej marrëveshjeve që të preferohet e të imponohet nga njëra palë”, ka deklaruar ai.
