Ministri në detyrë i Infrastrukturës dhe Transportit, Dimal Basha, ka paralajmëruar masa ligjore ndaj operatorëve ekonomikë që nuk po respektojnë dinamikën e punimeve në rrugën Prishtinë–Podujevë.
Përmes një postimi në Facebook, Basha bëri të ditur se ka inspektuar nga afër punimet në këtë aks rrugor, duke theksuar se projekti ka qenë një nga prioritetet e tij që nga marrja e detyrës.
“Që nga dita kur mora detyrën, kjo rrugë ka qenë një nga prioritetet e mia. Kam zhvilluar dhjetëra takime me mbikëqyrësit dhe menaxherët e kontratave, kam realizuar vizita të shumta në terren dhe kam takuar operatorët ekonomikë për të gjetur zgjidhje për secilin segment”, ka shkruar Basha.
Ai tha se, pas konsultimeve me operatorët ekonomikë, është arritur marrëveshje që disa pjesë kritike të projektit, veçanërisht urat dhe nyjet që paraqesin rrezik më të madh për qarkullimin, të përfundojnë më herët.
“Prioriteti ynë është siguria dhe lehtësimi sa më i shpejtë i qarkullimit”, ka theksuar ministri në detyrë.
Duke folur për segmentin në Bardhosh, Basha njoftoi se brenda kësaj jave pritet të përfundojë njëra pjesë e urës, ndërsa më pas do të riorganizohet qarkullimi për të lehtësuar lëvizjen e automjeteve.
Sa i përket segmentit në Vranidoll, ai kritikoi operatorin ekonomik për vonesat, duke e akuzuar për papërgjegjësi në realizimin e punimeve.
“Pavarësisht vizitave të shumta, takimeve dhe insistimit tonë të vazhdueshëm, operatori ekonomik ka treguar papërgjegjësi të vazhdueshme, si në ndërtimin e urës, ashtu edhe në punimet e tjera të këtij segmenti”, ka deklaruar Basha.
Ai shtoi se periudha e tolerancës ka përfunduar dhe se Ministria do të zbatojë të gjitha masat e parapara me ligj ndaj operatorëve që nuk respektojnë kontratat.
“Mendoj se kemi qenë mjaftueshëm tolerantë, duke shpresuar se problemet do të zgjidheshin përmes bashkëpunimit dhe mirëkuptimit. Mirëpo, kjo periudhë ka përfunduar. Tash e tutje, Ministria do të ndërmarrë të gjitha masat e parapara me ligj për mosrespektimin e dinamikës së kontratës. Nuk do të tolerojmë më vonesa të pajustifikuara apo mashtrime”, ka theksuar ai.
Basha bëri të ditur se segmenti nga Ura e Vranidollit deri në Teneshdoll është pothuajse i përfunduar, ndërsa kanë mbetur vetëm disa punime përmbyllëse. Ai shtoi se një pjesë e punimeve është shtyrë për shkak të gjetjeve arkeologjike, për të cilat Ministria është duke u koordinuar me Ministrinë e Kulturës.
Sipas tij, operatori ekonomik është zotuar që deri në fund të javës së ardhshme të lirojë për qarkullim një krah të Urës së Lluzhanit, ndërsa në segmentin te ura mbi lumin Llap asfaltimi ka përfunduar dhe kanë mbetur vetëm punimet finale.
Në përfundim, ministri në detyrë tha se janë adresuar edhe shqetësimet e banorëve përgjatë këtij aksi rrugor dhe se do të hartohet një projekt i veçantë për përmirësimin e mangësive të mbetura.
“E kuptoj plotësisht frustrimin e qytetarëve që çdo ditë përballen me vonesa dhe vështirësi në qarkullim. Do të vazhdoj të jem vazhdimisht në terren, duke mbikëqyrur punimet e mbetura dhe duke kërkuar përgjegjësi për çdo vonesë të pajustifikueshme”, ka përfunduar Basha.
