Bashkimi Evropian kërkon respekt të ndërsjellë dhe dialog në një kohë kur Samiti BE–Ballkani Perëndimor po mbahet në Mal të Zi, duke nënvizuar rëndësinë e bashkëpunimit rajonal dhe marrëdhënieve të fqinjësisë së mirë.
Kështu kanë porositur zyrtarët evropianë, duke reaguar lidhur me ngjarjet e së mërkurës, kur policia malazeze ktheu në Serbi një grup prej 87 shtetasish serbë që mbërritën me fluturim çarter, duke vlerësuar se ata përbënin rrezik për sigurinë. Më pas, disa shtetas malazezë u kthyen mbrapsht nga pikat kufitare me Serbinë.
Këto ngjarje shënuan një rritje të tensioneve mes Beogradit dhe Podgoricës.
Komisioni Evropian konfirmoi se ka marrë dijeni për vendimin e autoriteteve malazeze për të refuzuar hyrjen e një numri të caktuar personash nga Serbia për arsye sigurie, në përputhje me legjislacionin kombëtar. Ndërkohë, KE konfirmon se po monitoron situatën në pikat kufitare në Serbi.
“Kemi marrë dijeni për vendimin e autoriteteve malazeze për të refuzuar hyrjen e disa personave nga Serbia për arsye sigurie, në përputhje me legjislacionin kombëtar. Po monitorojmë situatën në pikat kufitare në Serbi dhe inkurajojmë kthimin në procedurat e rregullta për të shmangur ndërprerje të mëtejshme”, u tha nga shërbimi për shtyp i Komisionit Evropian.
Gjithçka po ndodh në prag të Samitit BE–Ballkani Perëndimor, i cili po mbahet për herë të parë në territorin e Malit të Zi.
Presidenti serb, Aleksandar Vuçiq, konfirmoi se po udhëtonte për në Tivat, qytetin ku mbahet samiti, duke nënvizuar se ishte e rëndësishme për të që të përfaqësonte Serbinë në këtë event.
Vuçiq deklaroi gjithashtu se ishte në dijeni të njoftimit të Agjencisë së Sigurisë dhe Informacionit të Serbisë, e cila e kishte këshilluar të mos udhëtonte në Mal të Zi për shkak të, siç u tha, “aktiviteteve armiqësore të shërbimeve të huaja dhe klaneve kriminale” në atë vend.
Ministria e Punëve të Jashtme e Malit të Zi deklaroi se, si një anëtar i përgjegjshëm dhe i besueshëm i NATO-s, Mali i Zi u garanton të gjithë mysafirëve të tij një qëndrim të sigurt, të mbrojtur dhe të këndshëm.
Samiti BE–Ballkani Perëndimor është ngjarja më e rëndësishme politike e nivelit më të lartë që mbahet një herë në vit. Ai zhvillohet kryesisht në Bruksel, por herë pas here organizohet edhe në ndonjë shtet kandidat, jashtë kufijve të Bashkimit Evropian.
Samiti në Mal të Zi ka peshë të veçantë për këtë shtet, pasi konsiderohet vendi i vetëm në rajon me një perspektivë kredibile për anëtarësim në Bashkimin Evropian para përfundimit të kësaj dekade. Gjithashtu, samiti përkon me jubileun e 20-vjetorit të shpalljes së pavarësisë së Malit të Zi.
Me këtë rast, autoritetet malazeze po organizojnë sonte një darkë solemne. Në këtë darkë nuk do të marrë pjesë presidenti serb, i cili po ashtu kishte refuzuar pjesëmarrjen në ceremoninë e shënimit të 20-vjetorit të pavarësisë, të mbajtur më 21 maj.
