Kryetari i Partisë Demokratike, Sali Berisha, ka kërkuar nga Partia Popullore Evropiane (PPE) dërgimin e një misioni fakt-mbledhës në Shqipëri, gjatë fjalës së tij në Asamblenë Parlamentare të PPE-së.
Ai deklaroi se ky mision do të kishte një rëndësi të jashtëzakonshme jo vetëm për Shqipërinë, por edhe për vendet e tjera të Evropës.
“Shqipëria është i vetmi narko-shtet në Evropë,” deklaroi Berisha, duke akuzuar qeverinë shqiptare për manipulim të zgjedhjeve dhe bashkëpunim me kartelet e drogës.
Berisha përmendi veprime të qeverisë që sipas tij cenojnë standardet demokratike, si shpërndarja e 100 eurove për çdo pensionist dhe falja e 200 milionë eurove gjoba e interesa pak ditë para zgjedhjeve.
Po ashtu foli edhe për rolin e patronazhistëve, të cilët i cilësoi si një “polici politike” të armatosur me të dhëna personale të qytetarëve, të përdorura për presion elektoral.
Sipas tij, Shqipëria është shndërruar në një qendër të kultivimit dhe trafikut të drogës, duke përmendur se janë dhënë 138 licenca për kultivim dhe janë mbjellë rreth 29 mijë hektarë me kanabis – shumë më tepër se lejon ligji.
“Një rrënjë kanabisi ka vlerë nga 500 deri në 1,000 euro,” tha ai.
Berisha akuzoi kryeministrin shqiptar për lidhje direkte me krimin e organizuar, duke përmendur emra konkretë dhe lidhje të pretenduara me kartele ndërkombëtare droge, përfshirë kartelin Sinaloa në Meksikë dhe grupime të tjera në Amerikën Latine.
“Ndihma që kërkoj nga PPE është dërgimi i një misioni verifikues në vendin tim. Ne kemi dokumente të shumta që tregojnë funksionimin e këtij narko-shteti,” u shpreh Berisha.
