Serbia po vazhdon përpjekjet për të penguar mbështetjen e Qeverisë së Kosovës ndaj shqiptarëve në Luginën e Preshevës, duke tentuar të bllokojë funksionimin e Këshillit Kombëtar Shqiptar (KKSh), ka thënë zëvendëskryeministri Besnik Bislimi.
Ky bllokim, sipas Bislimit, po bëhet përmes refuzimit të regjistrimit të kryetarit të ri të KKSh-së, Enkel Rexhepit, një veprim që konsiderohet si ndërhyrje politike dhe shkelje e të drejtave të shqiptarëve nga Serbia.
Në një status në Facebook të martën, Bislimi ka thënë se këto veprime të Serbisë nuk janë të izoluara, por pjesë e një strategjie të vazhdueshme për të diskriminuar shqiptarët në Luginë, për të bllokuar zhvillimin e tyre ekonomik dhe për të minuar institucionet e tyre legjitime.
“Ndihma e Kosovës për shqiptarët e Luginës është legjitime, fondet janë transparente dhe përbëjnë një mbështetje të drejtë e të nevojshme. Ndërsa bllokada ndaj funksionimit të KKSh-së është një ndërhyrje politike pa asnjë bazë ligjore, e cila synon ta mbajë këtë institucion jofunksional dhe të pafuqishëm për të mbrojtur të drejtat e shqiptarëve”, ka shkruar Bislimi.
Ai ka theksuar se Serbia synon të kontrollojë institucionet shqiptare në Luginë dhe të shuajë çdo zë të pavarur që kundërshton politikat e saj diskriminuese.
“Serbia dëshiron që shqiptarët të mos kenë zë dhe përfaqësim, por ne nuk do të qëndrojmë indiferentë përballë këtyre shkeljeve,” ka shtuar ai.
Por Bislimi ka theksuar se Qeveria e Kosovës do të vazhdojë mbështetjen ndaj shqiptarëve të Luginës, pavarësisht pengesave të Serbisë.
Zëvendëskryeministri ka bërë thirrje që edhe komuniteti ndërkombëtar të jetë vigjilent ndaj këtyre zhvillimeve dhe të reagojë ndaj përpjekjeve të Serbisë për të shkelur të drejtat e shqiptarëve në rajon.
Më herët, Bislimi ka thënë se Serbia po bllokon edhe ndihmat që Qeveria e Kosovës i ka dërguar për bujqit në Luginë.
Këshilli Kombëtar Shqiptar është institucion i vetëqeverisjes i komunitetit shqiptar në Serbi. Këshilli është formuar më 3 korrik 2010.
Gjatë ditës së sotme, edhe kryetari i ri i këtij këshilli, Enkel Rexhepi, ka reaguar duke thënë se Serbia po refuzon ta regjistrojë kryetarin e ri me çështje burokratike.
