Ish-këshilltari amerikan për sigurinë kombëtare, John Bolton dha alarmin pas një marrëveshjeje të ndërmjetësuar nga Kina midis Iranit dhe Arabisë Saudite për të rivendosur lidhjet diplomatike, përcjell Kosova Post.
Në një intervistë të dielën, Bolton paralajmëroi Shtetet e Bashkuara që të mos “ulen të qetë” derisa Kina zgjeron rolin e saj në botë dhe po afrohet më shumë me Rusinë, Iranin dhe Arabinë Saudite. “Ne qëndrojmë ulur ende, dhe kinezët, rusët, Irani, Koreja e Veriut dhe disa të tjerë po lëvizin për të forcuar marrëdhëniet e tyre dhe për të na kërcënuar në shumë vende të ndryshme”, tha Bolton, një skifter i politikës së jashtme të SHBA-së.
Paralajmërimet e Boltonit erdhën dy ditë pasi Irani dhe Arabia Saudite ranë dakord të rifillojnë marrëdhëniet e tyre diplomatike dhe të rihapin ambasadat dhe misionet e tyre diplomatike brenda dy muajve të ardhshëm.
Pakti pasoi disa ditë bisedimesh intensive në Pekin. “Është një tregues se sauditët dhe të tjerët po përpiqen të mbrojnë interesat e tyre me Kinën dhe Rusinë, sepse ata nuk mendojnë se Shtetet e Bashkuara kanë vendosmërinë dhe guximin e nevojshëm për të bërë atë që duhet të bëjnë për të mbrojtur botën kundër Iranit dhe synimeve të tij”, tha Bolton. “Bolton është i mirë për të folur për strategjinë. Rekordi i tij strategjik ndër të tjera përfshin armët e shkatërrimit në masë në Irak dhe Juan Guaido në Venezuelë. Aspak një dosje suksesi”, tha gazetari me bazë në Nju Jork, Don DeBar.
