Aleanca Shqiptare për Graçanicë, që përbëhet nga përfaqësues të partive shqiptare që veprojnë në Komunën e Graçanicë, përkatësisht LVV, LDK, PDK, AAK, mbështetë fuqimisht kandidaturën e Prof.Dr. Bekim Sejdiu për kandidat konsensual për President të Republikës së Kosovës.
Ne e njohim Prof. Sejdiun nga afër sepse kemi pasur fatin e madh që ta kemi mbështetësin dhe udhërrëfyesin kryesor të veprimtarisë tonë politike. Ai ka qenë figurë qëndrore në bashkimin tonë në një listë të vetme zgjedhore. Autoriteti i tij tek aktivistët tanë, pavarësisht përkatësisë partiake, është i pakontestueshëm dhe i pakrahasueshëm. Nga përvoja jonë politike e bashkëpunimit me Prof. Sejdiun, në një komunë me përbërje shumetnikë si Graçanica, jemi të bindur se Prof. Sejdiu e kupton më mirë se kushdo rëndësinë e ruajtjes së interesave të Republikës së Kosovës përmes mbrojtjes së Kushtetutës dhe ligjeve të saj, si dhe garantimit të të drejtave kushtetuese të komuniteteve etnike.
Ne u bëjmë thirrje partive tona politike dhe secilit deputet të Kuvendit të Republikës së Kosovës, që të dëgjojnë zërin tonë dhe të mbështesin kandidaturën e Prof. Dr. Bekim Sejdiut.
Shpresojmë se interesi shtetëror do mbizotëroje çfarëdo interesi tjetër. Republika e Kosovës, mbi të gjitha.
