Presidenti i Republikës Srpska Milorad Dodik u takua së fundi me drejtorin e kompanisë shtetërore ruse “RZD International”, një degë e “Russian Railways”, e cila është nën sanksione nga Bashkimi Evropian, SHBA dhe vende të tjera për rolin e saj në pushtimin e Ukrainës.
Pas takimit të mbajtur në mes të tetorit, Dodik ka shkruar në profilin e tij në Twitter se ka biseduar me Mansurbek Sultanov, drejtor i “RZD International”, për “përmirësimin e bashkëpunimit në fushën e transportit hekurudhor në Srpska”.
“Modernizimi i sistemit hekurudhor Srpska dhe ndërtimi i hekurudhave të reja janë një projekt kapital me rëndësi strategjike për të gjithë shoqërinë dhe ekonominë. Jam i bindur se përmes këtij bashkëpunimi ‘Hekurudhat e Republikës Srpska’ do të arrijnë një nivel të lartë”, ka shkruar Dodik.
Siç thuhet në komunikatën e zyrës së Presidentit, Sultanov e informoi Dodikun për projektet që kjo kompani “i zbaton në mbarë botën, por edhe në Ballkan, me theks të veçantë në Serbi, ku janë realizuar projekte të rëndësishme në fushën e infrastrukturës hekurudhore”.
Interesimi i ndërsjellë është shprehur për projektet që përfshijnë modernizimin dhe rindërtimin e “Hekurudhës së Republikës Srpska”.
Në vitin 2022, Mansurbek mori Urdhrin e Miqësisë nga Presidenti i Rusisë, Vladimir Putin, për “kontributin e tij të madh në forcimin e bashkëpunimit midis Rusisë dhe Serbisë në fushën e transportit”.
Në faqen e kompanisë “RZD International” shkruhet se “janë një firmë inxhinierike e themeluar në kuadër të “Russian Railways” që ofron një sërë shërbimesh ndërtimi në fushën e trafikut hekurudhor”. Selia e “RZD International” është në Moskë, por kanë një zyrë në Beograd.
“Hekurudhat ruse” janë nën sanksionet e disa vendeve, duke përfshirë Mbretërinë e Bashkuar dhe Shtetet e Bashkuara të Amerikës. Vendimet për të ndaluar biznesin me këtë kompani shtetërore ruse kryesisht pasuan fillimin e pushtimit të përgjithshëm të Federatës Ruse në Ukrainë më 24 shkurt 2022.
Në shpjegimin e sanksioneve, Qeveria e Mbretërisë së Bashkuar njofton se “Hekurudhat Ruse” është e përfshirë në mbështetjen e qeverisë ruse si një subjekt që ushtron biznes në sektorin e transportit, i cili është me rëndësi strategjike.
“Duke mundësuar transportin e ushtrisë ruse, automjeteve ushtarake dhe armëve drejt kufirit me Ukrainën, “Hekurudhat Ruse” ofron mbështetje për aktivitetet që destabilizojnë Ukrainën ose kërcënojnë integritetin territorial, sovranitetin dhe pavarësinë e saj”, thuhet në përshkrimin e sanksioneve të publikuara në mars 2022.
Bashkimi Evropian ka sanksionuar flukset financiare në lidhje me “Hekurudhat ruse” dhe mundësinë e dorëzimit të pajisjeve hekurudhore.
Detektor ka shkruar më parë për bashkëpunimin e autoriteteve të Republikës Srpska me organizata dhe kompani të sanksionuara nga Rusia, shkruan gazeta express.Zyra e Presidentit të Republikës Srpska nuk iu përgjigj kërkesës për koment deri në publikimin e tekstit.
