Temë diskutimi, sikurse në shtetet e tjera edhe në Kosovë, padyshim se është shpenzimi i energjisë elektrike. Me mungesën e saj, po përballet e gjithë bota dhe sigurisht se kjo po ndodh edhe në vendin tonë, me ç’rast Ministria e Ekonomisë po bën thirrje çdoherë që të kursehet rryma elektrike, në mënyrë që Kosova të mos mbetet në terr, raporton KosovaPost.
Megjithatë, pavarësisht kërkesës së Ministrisë, tashmë në kryeqytet poashtu edhe në komuna tjera kanë nisur dekorimet e vitit të ri me drita, ndriçime të cilat hargjojnë energji elektrike, duke i llogaritur edhe hapësirat publike si pishinat dhe stadiumi në Prishtinë.
Kur jemi te hapësirat publike, shteti i Hungarisë raportohet se ka marrë një vendim për mbylljen e stadiumeve dhe pishinave për të kursyer energjinë.
Redaksia e KosovaPost ka kontaktuar me Ministrinë e Ekonomisë, për të marrë një konfirmim se a do të merret ndonjë vendim i tillë në vendin tonë në mënyrë që të kursehet energjia.
Në përgjigjen e tyre, thuhet se ende nuk është marrë një vendim i tillë, mirëpo Komiteti Teknik i Energjisë po monitoron situatën që të rekomandojë ndonjë masë të re varësisht prej rrethanave.
“Prej kur janë shpallur masat emergjente të furnizimit me energji, Ministria e Ekonomisë, respektivisht Qeveria ka ndërmarr disa veprime dhe vendime të cilat do të ndikojnë në uljen e konsumit, respektivisht krizës energjetike. Me qëllim të tejkalimit të lehtë të krizës energjetike”, thuhet ndër të tjera në përgjigjen e Ministrisë.
“Sipas analizave del se konsumi i energjisë elektrike krahasuar me muajt paraprak të vitit të kaluar është uluar dhe pritet që ky trend të përcillet edhe gjatë muajve në vijim. Kjo ulje e konsumit mund t’i atribuohet edhe veprimeve dhe masave, të cilat janë ndërmarr me qëllim të zvogëlimit të ndikimit të krizës energjetike”, thuhet tutje.
Ministria e Ekonomisë, konfirmon për KosovaPost se ka ndarë 6 milionë euro me qëllim të subvencionimit të konsumatorëve fundor për zbatimin e masave për kursim të energjisë.
“Tashmë ka përfunduar procesi i thirrjes së parë publike dhe konsumatorët kanë përfituar nga kjo dhe tani është hapur edhe thirrja e dytë për subvencionimin e konsumatorëve fundor për zbatimin e masave për kursim të energjisë”.
Theksojmë se sot, Kuvendi i Kosovës, ka shqyrtuar vendimin për zgjatjen e masave emergjente edhe për 30 ditë. Subvencionimin e energjisë për të ulur ndikimin e tarifave të energjisë te konsumatorët, duke marrë parasysh rritjen enorme të çmimeve të importit dhe subvecnionimin e kursimit të energjisë për ata konsumatorë që kursejnë në krahasim me konsumin e vitit të kaluar në furnizimin e energjisë./KosovaPost/
