Presidenti turk Recep Tayyip Erdoğan ka zhvilluar bisedë telefonike me kryeministrin pakistanez Shehbaz Sharif, të cilit i ka shprehur gatishmërinë e Türkiyes për të “bërë çmos për të parandaluar përshkallëzimin e mëtejshëm të tensioneve” midis Indisë dhe Pakistanit, transmeton Anadolu.
Sipas Drejtorisë së Komunikimeve të Presidencës së Türkiyes, gjatë telefonatës janë diskutuar tensionet midis Indisë dhe Pakistanit, sulmi që ndodhi natën e 6 majit dhe zhvillimet e fundit.
“Në telefonatë, presidenti Erdoğan shprehu solidaritetin e Türkiyes me Pakistanin, u shprehu ngushëllimet e tij martirëve pakistanezë të sulmit dhe u uroi shërim të shpejtë të plagosurve”, tha Drejtoria në X.
Ai shprehu mbështetjen e Ankarasë për “qasjen e qetë dhe të matur” të Pakistanit.
Udhëheqësi turk ka thënë se propozimi i Pakistanit për një hetim ndërkombëtar neutral, transparent dhe të besueshëm për sulmin e 22 prillit në Xhamu dhe Kashmir është i përshtatshëm.
Islamabadi sot tha se të paktën 26 civilë u vranë dhe 46 të tjerë u plagosën në operacionin “Sindoor” të Indisë në Pakistan dhe Kashmirin e administruar nga Pakistani. New Delhi tha se shënjestroi “infrastrukturën terroriste” në Pakistan.
