Fondacioni për të Drejtat e Kafshëve ka bërë të ditur dënimin e një personi që dyshohet se i ka shkaktuar vdekje një qeni përmes anestetikëve, gjatë aksionit për kapjen e qenve endacakë për kastrim.
Sipas këtij Fondacioni, i dënuari ishte kontraktor i Komunës së Prishtinës në projektin “Kap, Sterilizo, Vaksino, Lësho”, e ku i njëjti është dënuar me 120 euro.
FDK thotë se ky dënim nuk është i duhur.
“Dënimi është shumë simbolik (120 EUR) dhe në rast se nuk ka për të paguar këtë shumë, aplikohet 6 ditë burgim. Nuk jemi të kënaqur se si Prokuroria dhe Gjykata nuk e kanë marrë parasysh Nenin 343 të Kodit Penal të Republikës së Kosovës, që parasheh dënime për dhënien e ndihmës veterinare në mënyrë të pandërgjegjshme. Përkundër kësaj, Gjykata ka vërtetuar veprimet e të akuzuarit/dënuarit me këtë rast”, thuhet në reagimin e FDK-së në Facebook.
Fondacioni për të Drejtat e Kafshëve ka shkruar se ky rast e ka dëshmuar që stafi i shumë subjekteve veterinare të kontraktura ka mungesë të trajnimeve bazike për procedurat KSVL-së.
“Fatkeqësisht, përveç trajnimeve tejet të pakta për kastrim/sterilizim, në Kosovë nuk janë mbajtur asnjëherë trajnime për procese tjera të KSVL-së, siç është kapja e qenve. Edhe përkundër trajnimeve për kastrim/sterilizim, dhe përkundër projekteve të shumta publike, ende ka subjekte veterinare dhe veterinerë që nuk dijnë të kryejnë një sterilizim siç duhet, siç është rasti me operatorin “Goni” dhe punën e tij në Komunë të Prishtinës”.
