Policia e Kosovës dhe Dogana e Kosovës kanë parandaluar të dielën një rast të mosdeklarimit të një shume të madhe parash në Pikëkalimin Kufitar Dheu i Bardhë, përcjell KosovaPost.
Rasti është zbuluar gjatë kontrollit të detajuar të një autobusi të linjës ndërkombëtare. Sipas njoftimit të Policisë, autoritetet kanë gjetur dhe sekuestruar 100 mijë euro, të ndara në 500 kartëmonedha nga 200 euro.
Paratë, sipas autoriteteve, nuk ishin deklaruar në përputhje me procedurat e përcaktuara.
“Në vijim të bashkëpunimit të ngushtë ndërmjet Policisë së Kosovës dhe Doganës së Kosovës, sot në Pikëkalimin Kufitar Dheu i Bardhë është parandaluar një rast i mosdeklarimit të mjeteve monetare. Gjatë kontrollit të detajuar të një autobusi të linjës ndërkombëtare, autoritetet gjetën dhe sekuestruan 100,000 euro (të ndara në 500 kartëmonedha prej 200 eurosh), të cilat nuk i ishin nënshtruar procedurave të obligueshme të deklarimit”, thuhet në njoftimin e Policisë.
Sipas Policisë, mjetet monetare janë sekuestruar, ndërsa ndaj personit përgjegjës është iniciuar procedurë për kundërvajtje doganore.
