Kandidatja presidenciale demokrate, Kamala Harris, ka humbur shtetin kritik të Miçiganit, ku votat e komuniteteve arabe dhe myslimane janë vendimtare, sipas Associated Press, transmeton Anadolu.
Kandidati republikan presidencial Donald Trump ka siguruar 15 vota elektorale në këtë shtet, ku shumica e myslimanëve amerikanë janë ndier të tradhtuar dhe të zemëruar nga mbështetja e pakushtëzuar e administratës Biden-Harris për Izraelin, i cili ka vrarë më shumë se 43.000 palestinezë në Gaza që nga tetori i vitit të kaluar.
Trump ka tejkaluar 270 votat e Kolegjit Elektoral të nevojshme për të fituar zgjedhjet presidenciale të vitit 2024 në SHBA, tha AP.
Ai mundi Harrisin në garën e së martës, duke fituar 292 vota të Kolegjit Elektoral dhe duke siguruar vendin e tij si presidenti i 47-të i vendit. Harris ka fituar 224 vota.
Trump kryesoi ndaj Harrisit me rreth 5 milionë vota në numërimin kombëtar, ndërsa mori rreth 71 milionë vota.
Fitorja e Trumpit shënon një rikthim historik pasi ai nuk u rizgjodh për një mandat të dytë radhazi në vitin 2020, në të cilin ai pretendoi se zgjedhjet ishin manipuluar dhe u përpoq pa sukses për të përmbysur rezultatet.
Trump do të inaugurohet për mandatin e tij të dytë në Shtëpinë e Bardhë më 20 janar 2025.
