Drejtori i Përgjithshëm i Policisë së Kosovës, kolonel Gazmend Hoxha, ka pritur sot në një takim zyrtar ambasadorin e ri të Bashkimit Evropian dhe Shefin e Zyrës së BE-së në Kosovë, Dirk Schubel, transmeton KosovaPost.
Sipas njoftimit, në takim, Hoxha i ka uruar mirëseardhje ambasadorit Schubel në detyrën e re, ndërsa e ka njoftuar atë me angazhimet dhe prioritetet e Policisë së Kosovës, si dhe me sfidat me të cilat përballet institucioni në përmbushjen e misionit për garantimin e rendit dhe sigurisë për të gjithë qytetarët.
“Në këtë takim ndër të tjera u diskutua edhe për rëndësinë e vazhdimit të mbështetjes së BE-së në forcimin e kapaciteteve profesionale dhe institucionale të PK-së, me ç’rast ambasadori Schubel nga ana e tij vlerësoi se bashkëpunimi me PK-në është i një rëndësie të veçantë ngase kontribuon në forcimin e sigurisë dhe sundimit të ligjit:, thuhet në njoftim.
Drejtori i Përgjithshëm i PK-së u zotua se Policia e Kosovës do të vazhdojë të mbetet e përkushtuar në forcimin e bashkëpunimit me partnerët ndërkombëtarë me qëllim të ruajtjes së rendit, sundimit të ligjit dhe ofrimit të shërbimit professional ndaj qytetarëve të Republikës së Kosovës.
