Për përpjekjet që autorët e masakrës së Reçakut të tjetërsoheshin, Serbia po i përdorte edhe dy shqiptarë në Kosovë, emrat e të cilëve u bënë publikë në qershorin e vitit të kaluar, Bedri Shabanin dhe Muharrem Qerimin, të cilët më pas, me urdhër të prokurorisë u arrestuan nga policia, nën dyshimin për spiunazh.
Për këto veprime të Serbisë, njohësi i sigurisë, Avni Islami thotë se ajo në vazhdimësi ka bërë përpjekje që autorët e krimit makabër në Reçak, që tronditi botën, t`i ndryshojë.
“Serbia në vend se të kërkoj falje për krimet e kryera jo vetëm në masakrën e Recakut por edhe në masakrat tjera, e në vazhdimësi është përpjekur që ti fabrikoj provat e rrejshme, dhe kjo përpjekje ishte bërë edhe në një kohë të gjatë kur u demaskua vitin e kaluar e pastaj u arrestuan edhe dy agjentë shqiptarë të cilët u përpoqën që t’i tjetërsojnë provat materiale, pastaj duke fabrikuar edhe prova të rrejshme kinse civilët e vrarë ishin pjesëtarë të Ushtrisë Çlirimtare të Kosovës dhe duke u përpjekur që këtë masakër tua hudhin shqiptarëve, UCK-së dhe këto të përdoreshin në Hagë si prova materiale kundër krerëve të UÇK-së”, ka thënë Islami.
Sipas Islamit, Serbia me këto veprime po mundohet të diskreditojë luftën e shenjtë të Ushtrisë Çlirimtare të Kosovës.
“Masakra e Reçakut ishte zgjimi i ndjenjës njerëzore ndërkombëtare dhe masakra e Reçakut ishte ajo e cila e vulosi vendimin e Aleancës euroatlantike që ta bombardojnë Serbinë dhe ta ndal gjenocidin ndaj popullatës civile të Kosovës, prandaj dhe pikërisht për këtë Serbia jo vetëm që është përpjekur që të fabrikoj prova të rrejshme në raport me Ushtrisë Çlirimtare të Kosovës por edhe bashkësinë ndërkombëtare për bombardime të cilat i ka bërë të përpiqet që të vendos bashkësinë ndërkombëtare në një pozitë se kinse ata gabimisht dhe me plane djallëzore e kanë bërë këtë operacion ndaj shtetit serb”, ka shtuar Islami.
Ndërkaq, vitin e kaluar mediat në Serbi kishin raportuar se masakra e Reçakut ishte trillim dhe gënjeshtër e Kosovës, si pretekst për të nisur fushatë masive mediatike kundër ish-regjimit të Millosheviqit.
