Deputeti shqiptar në Kuvendin e Serbisë, Shaip Kamberi, ka reaguar ndaj deklaratave të presidentit serb, Aleksandar Vuçiq, i cili, sipas Kamberit, e ka cilësuar atë si “më të keqin” ndër shqiptarët, përcjell KosovaPost.
Kamberi ka thënë se do të donte të dinte se çfarë e shqetëson Vuçiqin te angazhimi i tij politik.
Ai ka përmendur kërkesat për të drejta të barabarta për shqiptarët e Luginës së Preshevës, zbatimin e marrëveshjeve të nënshkruara nga Serbia, si dhe çështjet e diskriminimit, arsimit, gjuhës, përfaqësimit proporcional dhe zhvillimit ekonomik të komunave shqiptare.
“Dhe mbi të gjitha, pse e shqetëson kaq shumë fakti që shqiptarët janë bashkuar?”, ka shkruar Kamberi.
Sipas tij, bashkimi politik i shqiptarëve nuk është kundër askujt, por synon përfaqësim më të mirë të qytetarëve që i kanë votuar.
“Ne nuk jemi bashkuar kundër askujt. Jemi bashkuar për të përfaqësuar më mirë qytetarët që na kanë votuar”, ka deklaruar ai.
Kamberi ka mohuar gjithashtu se ka përdorur ndonjëherë shprehjen “100 për një” apo se ka kërcënuar dikë me hakmarrje në emër të shqiptarëve.
Ai i ka kërkuar Vuçiqit që, në vend të etiketimit të tij, të tregojë konkretisht se cilat nga kërkesat e tij janë antikushtetuese, antidemokratike apo antievropiane.
“Unë nuk kërkoj të drejta për shqiptarët duke ua mohuar ato serbëve. Kërkoj barazi, përfaqësim dhe respekt për të drejtat që u takojnë të gjithë qytetarëve”, ka shkruar Kamberi.
Kamberi ka shtuar se kërkon të njëjtat standarde që, sipas tij, presidenti Vuçiq i kërkon për serbët.
“Dhe nëse kjo është arsyeja pse unë jam ‘më i keqi’, atëherë OK, le të mbetem më i keqi. Nuk më duhen lavdatat e tij, por le të flasim për kërkesat konkrete dhe jo me etiketime”, ka përfunduar Kamberi.
