Katër raste të personave të zhdukur janë raportuar në Policinë e Kosovës, sipas raportit të fundit 24-orësh të këtij institucioni.
Në fshatin Siboc i Epërm të Podujevës, më 4 shtator rreth orës 08:30, një burrë ka raportuar se vajza e tij e mitur ka dalë nga shtëpia dhe nuk është kthyer më. Policia ka bërë të ditur se rasti është duke u hetuar.
Një rast tjetër është raportuar në Drenas, më 4 shtator rreth orës 17:00. Ankuesi ka deklaruar se djali i tij ka dalë nga shtëpia dhe nuk është kthyer. Edhe ky rast është nën hetime.
Në Prizren, një grua ka njoftuar policinë se mbesa e saj, e mitur dhe shtetase e Shqipërisë, është larguar nga shtëpia dhe nuk është kthyer më. Rasti është duke u hetuar.
Ndërkohë, në Pejë është raportuar për një person të zhdukur që nga 28 gushti. Një grua ka deklaruar se motra e saj ka dalë nga shtëpia dhe që atëherë nuk dihet asgjë për vendndodhjen e saj. Edhe ky rast është nën hetime.
Rastet e personave të zhdukur raportohen çdo vit në Kosovë. Sipas të dhënave historike të Policisë së Kosovës, në vend raportohen mesatarisht 150 deri në 250 raste të personave që largohen nga shtëpia, kryesisht të mitur, por edhe persona me probleme të shëndetit mendor.
Të dhënat e Policisë tregojnë se pjesa dërrmuese e rasteve të personave të raportuar të zhdukur zgjidhen, ndërsa një përqindje shumë e lartë e tyre kthehen në familjet e tyre ose gjenden pas kërkimeve të institucioneve të sigurisë.
Policia e Kosovës u bën thirrje qytetarëve që, në rast të zhdukjes së një familjari, ta raportojnë rastin sa më shpejt në stacionin më të afërt policor, në mënyrë që kërkimi dhe hetimi të mund të nisin pa vonesë.
