Ministrja në detyrë, Fitore Pacolli, ka njoftuar se Gjykata Themelore në Prishtinë ka vendosur masë sigurie për një hapësirë prej mbi 68 ari në zonën e Fakulteteve Teknike, për të cilën, sipas saj, kishte pasur përpjekje për tjetërsim, përcjell Kosova Post.
Pacolli ka thënë se me këtë vendim po mbrohet prona publike e Universitetit të Prishtinës nga rreziku i tjetërsimit.
Ajo ka bërë të ditur se çështja ishte ngritur dhe trajtuar në kuadër të punës së Komisionit për Mjedis, Ushqim, Bujqësi, Planifikim dhe Zhvillim, të cilin e ka udhëhequr si kryetare.
Sipas Pacollit, në trajtimin e kësaj çështjeje ka pasur kontribut edhe ish-deputeti Milazim Salijaj, me të cilin, siç ka thënë ajo, kanë kërkuar që pretendimet dhe dyshimet për këtë pronë të hetohen nga institucionet kompetente.
“Vendosja e masës së sigurisë për këtë pronë mbi 68 ari është një hap i rëndësishëm në mbrojtje të pasurisë publike”, ka shkruar Pacolli.
Ajo ka thënë se do të vazhdojë angazhimin për mbrojtjen e pronave publike përmes ligjit dhe përgjegjësisë institucionale.
