PRISHTINË | KOSOVA POST – Partia Demokratike Turke e Kosovës (KDTP) i është bashkuar thirrjes për pjesëmarrje në Marshin për Liri, i cili do të mbahet nesër në Prishtinë, duke përcjellë një mesazh të fuqishëm për drejtësi, liri dhe unitet shoqëror.
Në deklaratën e saj, KDTP ka theksuar se liria dhe pavarësia e Kosovës janë rezultat i sakrificave të mëdha dhe i një lufte historike, e cila, sipas kësaj partie, shpërfaqi vullnetin e popullit të Kosovës për liri.
“Sakrificat e bëra dhe çmimi i paguar në këtë luftë do të ruajnë gjithmonë një vend të jashtëzakonshëm në historinë dhe kujtesën kolektive të Kosovës”, thuhet në deklaratën e KDTP-së.
Partia Demokratike Turke e Kosovës ka shprehur gjithashtu pritshmërinë që vendimi që pritet të shpallet më 16 shtator në Hagë të përfundojë me lirim, duke kërkuar që procesi të udhëhiqet nga drejtësia dhe paanësia.
KDTP ka bërë të ditur se përfaqësuesit dhe aktivistët e saj do të jenë pjesë e marshit, i cili do të nisë nesër në orën 14:00 në Prishtinë, së bashku me qytetarë nga të gjitha komunitetet.
“Bashkë me të gjithë popullin tonë do të shfaqim në mënyrë paqësore unitetin, bashkimin tonë, si dhe besimin dhe vendosmërinë tonë për liri dhe drejtësi”, thuhet në deklaratë.
Sipas KDTP-së, Marshi për Liri është një mundësi për të shprehur edhe një herë fuqishëm vullnetin e përbashkët dhe përkushtimin ndaj vlerave mbi të cilat është ndërtuar liria e Kosovës.
“Për drejtësinë, për lirinë, do të marshojmë së bashku.”
