Pas shfaqjes së posterëve me gjuhë urrejtjeje kundër shqiptarëve në Krushevc, reaguan Avokati i Popullit dhe një pjesë e opozitës në Serbi, duke kërkuar identifikimin dhe ndjekjen penale të përgjegjësve.
Avokati i Popullit në Serbi, Zoran Pashalliq, u ka bërë thirrje organeve kompetente që urgjentisht të hetojnë vendosjen e posterëve me mesazhe urrejtjeje në Krushevc, të drejtuara kundër pjesëtarëve të komunitetit shqiptar, si dhe të identifikojnë dhe ndjekin penalisht përgjegjësit.
Sipas njoftimit, Pashalliq kërkoi që institucionet të ndërmarrin të gjitha masat për të parandaluar përsëritjen e incidenteve të ngjashme, duke theksuar se shteti ka detyrimin të mbrojë të drejtat e të gjitha pakicave kombëtare dhe të reagojë ndaj çdo forme diskriminimi, gjuhe të urrejtjes dhe nxitjeje të urrejtjes etnike.
Sipas tij, mesazhe të tilla cenojnë sigurinë e qytetarëve, dëmtojnë besimin ndëretnik dhe nuk kanë vend në një shoqëri demokratike të bazuar në të drejtat e njeriut, barazinë dhe sundimin e ligjit.
Ai u bëri thirrje qytetarëve, institucioneve, mediave dhe zyrtarëve publikë që të kontribuojnë në ndërtimin e një shoqërie ku dallimet respektohen dhe mosmarrëveshjet zgjidhen përmes dialogut, e jo përmes urrejtjes dhe diskriminimit.
Posterët u shfaqën para një furre buke në Krushevc, pronarët e së cilës janë shqiptarë. Në to, qytetarët ftoheshin të “kujtojnë Gazimestanin” dhe të mos blejnë në dyqanet e shqiptarëve.
Reagoi edhe juristja dhe ish-komisionerja për mbrojtjen e barazisë, Brankica Jankoviq, e cila, në një prononcim për N1, vlerësoi se posterët meritojnë dënim të gjerë shoqëror, pasi gjuha e urrejtjes po bëhet gjithnjë e më e pranueshme në shoqëri.
Sipas saj, bëhet fjalë për gjuhë të qartë urrejtjeje me qëllim frikësimin e pjesëtarëve të pakicës kombëtare shqiptare dhe nxitjen e ndarjeve në shoqëri. Ajo paralajmëroi se retorika e tillë krijon armiq të rinj dhe lë pasoja afatgjata në marrëdhëniet ndëretnike.
Reagimi i Lëvizjes së Qytetarëve të Lirë: Të ndalet nxitja e urrejtjes ndaj shqiptarëve në Krushevc
Partia opozitare proevropiane, Lëvizja e Qytetarëve të Lirë, dënoi ashpër vendosjen e posterëve, duke vlerësuar se ato përbëjnë një shënjestrim të hapur të qytetarëve vetëm për shkak të përkatësisë së tyre kombëtare.
Sipas kësaj partie, është veçanërisht shqetësuese që posterët janë vendosur pikërisht para një furre buke në pronësi të një familjeje shqiptare, duke i ekspozuar pronarët ndaj presionit, frikësimit dhe rrezikut të dhunës.
Lëvizja kërkoi nga policia dhe prokuroria që të identifikojnë autorët e posterëve dhe të hetojnë nëse në këtë rast ekzistojnë elemente të nxitjes së urrejtjes dhe intolerancës kombëtare. Ajo paralajmëroi se heshtja e institucioneve vetëm sa i inkurajon autorët e akteve të tilla.
Në reagim theksohet se përgjegjësia penale është individuale dhe se askush nuk duhet të jetë objekt diskriminimi për shkak të emrit ose përkatësisë etnike. Sipas Lëvizjes së Qytetarëve të Lirë, Serbia duhet të jetë një shtet ku qytetarët vlerësohen sipas veprave të tyre, e jo sipas kombësisë.
