Eugen Cakolli nga KDI ka publikuar listat me emra të kandidatëve që pritet të jenë deputetët e ri të Kuvendit të Kosovës, përcjell KosovaPost.
Cakolli në një postim në Facebook, ka publikuar listat e të gjitha partive politike që garuan në zgjedhjet e 9 shkurtit.
“Pas numërimit të votave nga vendvotimet e rregullta, votave nga jashtë dhe rreth 80% të votave me kusht – me votat e mbetura që nuk pritet të sjellin ndonjë ndryshim – kjo pritet të jetë përbërja e re e legjislaturës së ardhshme të Kuvendit të Kosovës. Gjithashtu, pavarësisht diferencave relativisht të vogla mes disa kandidatëve, me ndryshime minimale, kjo pritet të jetë përbërja e grupeve parlamentare të subjekteve politike që kanë siguruar mandate – përfshirë edhe subjektet politike të komuniteteve jo-shumicë”, ka shkruar Cakolli.
