Janë hapur qendrat e votimit nëpër pikat e vendvotimeve në Kosovë.
Kryesuesi i Komisionit Qendror të Zgjedhjeve, Kreshnik Radoniqi, ka votuar në qendrën e votimit në shkollën fillore “Lidhja e Prizrenit” në Pejë.
Qytetarët e Republikës së Kosovës sot do të ushtrojnë të drejtën e votës – në zgjedhjet e para të rregullta parlamentare që prej shpalljes së pavarësisë më 2008. Numri i qytetarëve me të drejtë vote në vendvotime, sipas të dhënave të Komisionit Qendror të Zgjedhjeve, është 1 milion e 970 mijë e 944 votues.
Për herë të parë do të votojnë 125 mijë e 852 votues. Ndërmjet dy proceseve zgjedhore, këta shtetas të Kosovës kanë mbushur 18 vjeç sipas të dhënave të KQZ në listat e votuesve.
Numri i qendrave të votimit të cilat do të hapen të dielën e 9 shkurtit është 941, prej të cilave 903 për votimin e rregullt me gjithsej 2,533 vendvotime dhe 38 qendra të votimit për votimin me kusht (nga një për çdo komunë) me gjithsej 56 vendvotime.
Numri i qytetarëve me të drejtë vote, emrat e të cilëve janë të shpërndarë në 903 qendra të votimit apo në 2,533 vendvotimet e tyre, është: 1,970,944.
Sipas vendimit të KQZ-së, numri i përgjithshëm i anëtarëve që do të angazhohen në 2,533 Këshillat e Vendvotimeve të rregullta është më shumë se 12 mijë, ndërkaq, ndërkaq më shumë se 200 anëtarë do të angazhohen në 56 Këshillat e Vendvotimit në të cilat do të zhvillohet votimi me kusht.
Rikujtojmë se ligji i ri për Zgjedhjet e Përgjithshme ka ndryshuar edhe aspektin e numërimit të fletëvotimeve. Në ditën e zgjedhjeve, në vendvotime do të numërohet vetëm pjesa e fletëvotimit ku qytetarët kanë votuar për subjektet politike. Kjo ia mundëson KQZ-së që brenda një kohe të shpejtë të publikojë rezultatet preliminare për subjektet politike.
Një ditë më pas, për dallim nga zgjedhjet e kaluara, në Qendra Komunale të Numërimit, do të fillojë numërimi i pjesës tjetër të fletëvotimit, pra vota për kandidatët për deputetë, shkruan rtk.Gjatë proceseve zgjedhore, në çdo komunë dhe kryesisht në palestra sportive, KQZ ka caktuar Qendrat Komunale të Numërimit.
