Kryeministri i Kosovës, Albin Kurti,po qëndron për vizitë në Mal të Zi. Ai ka publikuar fotografi nga darka e shtruar nga kryeministri malazez, Milojko Spajic, në Kotorr, ku edhe po mbahet Samiti i liderëve të Ballkanit Perëndimor dhe BE-së, përcjell KosovaPost.
Në fotografitë e publikuara në platformën “X”, Kurti shihet duke shtrënguar duart me ndihmës sekretarin amerikan të Shtetit për Evropën dhe Euroazinë, Jim O’Brien dhe kryeministrin e Malit të Zi.
Ai ka thënë se në këtë samit do të diskutojnë për përparimin në agjendën e platformës së Planit të Rritjes së BE-së dhe çështjet rajonale.
“Ne do të diskutojmë përparimin tonë në Agjendën e Reformës së Planit të Rritjes së BE-së dhe çështjet rajonale, duke përfshirë gjendjen e zbatimit të marrëveshjeve që kemi arritur në Procesin e Berlinit”, ka shkruar Kurti në “X”.
Shkuarjen e Kurtit në Mal të Zi më herët e ka konfirmuar Zyra e Kryeministrit përmes një komunikate për media ku thuhet se sonte kryeministri do të marrë pjesë në darkën e liderëve të shtruar nga kryeministri malazez, Milojko Spajic.
