Kryeministri i Kosovës, Albin Kurti mori pjesë në panelin e diskutimit me titull “Konventa Kombëtare Demokratike dhe Roli i Partive Politike”, transmeton KosovaPost.
Zyra e Kryeministrit ka njoftuar se ngjarja u mbajt në Çikago, atje ku dhe po zhvillohet Konventa Kombëtare Demokratike, dhe siç thuhet në komunikatë, u organizua nga NDI, si pjesë e Forumit Ndërkombëtar të Liderëve 2024.
Para fillimit të diskutimit, sipas Zyrës së Kryeministrit, Kurti u takua dhe bashkëbisedoi me Kryetarin e Komitetit Kombëtar Demokrat, Jaime Harrison, në prani dhe të Presidentes së NDI, Tamara Ëittes dhe Kryetarit të Bordit Drejtues të NDI, Tom Daschle.
“Pjesë e panelit bashkë me kryeministrin Kurti ishte dhe ish-Sekretari i Përgjithshëm i NATO-s, Lord George Robertson dhe Ministri i Jashtëm i Danimarkës dhe ish-kryeministri, Lars Løkke Rasmussen. Në adresimin hyrës të tij, kryeministri Kurti fillimisht falënderoi NDI për partneritetin me Kosovën dhe kontributin e tyre për vendin tonë përgjatë viteve”.
“Mbi temën e diskutimit, ai tha se “Partitë politike janë natyrshëm politike. Sfida është se si t’i kthejmë në shoqërore. Këtu mendoj se qëndron dhe suksesi ynë. Tre kategoritë shoqërore që e mundësuan fitoren tonë janë gratë, të rinjtë dhe diaspora. Filluam duke vënë në pah kontributin e grave në shoqëri dhe duke nënvizuar rolin shoqëror të grave. Në anën tjetër, duke patur moshën mesatare të popullsisë në Kosovë 34 vjeç, punuam me të rinjtë përmes kulturës, artit, sportit e debateve mbi teoritë kritike.”
“Ai shtoi se konstelacioni i përbërjes së Qeverisë tashmë ka një të tretën e ministrave të kabinetit qeveritar të cilat janë gra, 40 për qind e grupit parlamentar janë gra, dy nga tre zëvendëskryeministra janë gra dhe se gjithmonë theksojmë se shpesh gratë janë udhëheqëset më të mira dhe organizatorët më të mirë. Përgjatë panelit, u diskutua dhe mbi mënyrat se si partitë politike duhet të përgatiten e pajisen më së miri për t’i bërë ballë sfidave dhe kërcënimeve të cilat paraqiten së brendshmi dhe së jashtmi”, thuhet tutje në komunikatë.
