Kryeministri i vendit, Albin Kurti, sot priti në takim ish-presidentët e Shqipërisë dhe atë të Kosovës, Alfred Moisiu dhe Fatmir Sejdiu.
Bëhet e ditur se Kurti iu uroi mirëseardhjen në kryeministri, pas pjesëmarrjes së djeshme që kishin në konferencën “Balkan Leadership Conference”, të organizuar nga Federata e Paqes Universale në bashkëpunim me Qeverinë e Republikës së Kosovës.
“Gjatë këtij takimi u diskutua rreth progresit ekonomik dhe demokratik të Kosovës, për marrëdhëniet Kosovë-Shqipëri lidhur me projektet e përbashkëta mes dy shteteve, në veçanti ato në fushën e ekonomisë, të cilat e fuqizojnë edhe më shumë lidhshmërinë mes republikave tona”, thuhet në një njoftim të zyrës për informim të Kryeministrit.
Gjithashtu, bëhet e ditur se u bisedua edhe për zhvillimet aktuale në rajon dhe botë. Moisiu dhe Sejdiu i uruan Kryeministrit punë të mbarë dhe suksese të mëtutjeshme edhe duke iu gëzuar faktit të progresit ekonomik të Kosovës të arritur gjatë viteve të fundit.
