Raportet tregojnë se regjisori palestinez, fitues i Çmimit Oscar, Hamdan Ballal është rrahur dhe rrëmbyer nga sionistët izraelit, transmeton Kosova Post.
Hamdan Ballal, një regjisor palestinez dhe një nga krijuesit e dokumentarit “Nuk ka tokë tjetër” (“No Other Land”), fitues i çmimit Oscar, u zhduk të hënën në mbrëmje pas një sulmi nga kolonët izraelitë në fshatin Susiya në jug të Bregut Perëndimor.
Ky incident shkaktoi një valë shqetësimesh dhe protestash ndërkombëtare dhe ekspozoi edhe një herë politikat raciste dhe represive të regjimit sionist.
Yuval Abraham, regjisor, koleg i Hamdan Ballalit dhe një nga krijuesit e dokumentarit “Nuk ka tokë tjetër”, në një postim në rrjetin social X, duke reaguar ndaj këtij incidenti, shkroi: “Një grup kolonësh së fundmi morën Hamdan Ballalin dhe e rrahën. Ai ka pësuar lëndime në kokë dhe në bark dhe ka pasur gjakderdhje. Ushtarët sulmuan edhe ambulancën që kishte ardhur për të ofruar ndihmë dhe e morën Ballalin me vete”.
Gjithashtu, edhe agjencia e lajmeve Associated Press, në një raport duke cituar dëshmitarët e pranishëm në skenën e rrahjes së Ballalit nga kolonët sionistë, shkroi: “Një grup prej 10 deri në 20 kolonësh të maskuar e sulmuan me gurë dhe shkopinj atë dhe disa aktivistë hebrenj që bënin thirrje për paqe, duke thyer xhamat e makinave të tyre dhe duke ua çarë gomat atyre”.
Sipas dëshmitarëve, shumica e personave të maskuar ishin adoleshentë me shkopinj dhe thika. Ndërkaq, tre palestinezë u arrestuan dhe, sipas avokatit të tyre, u dërguan në një qendër ushtarake përpara se të merreshin në pyetje. Associated Press deklaroi se arsyeja e arrestimit të regjisorit palestinez ishte filmimi i një sulmi kolonësh ndaj palestinezëve në fshatin Susiya.
Dokumentari “Nuk ka tokë tjetër” tregon historinë e një familjeje palestineze, shtëpia e së cilës shkatërrohet nga sionistët dhe anëtarët e asaj familjeje mbeten rrugëve dhe kthehen në refugjatë a të zhvendosur. Filmi u vlerësua nga anëtarët e jurive dhe audienca në festivalet ndërkombëtare filmit në Berlin, Toronto, Vankuver dhe Nju Jork, dhe arriti të tërhiqte vëmendjen globale për situatën e rëndë të palestinezëve. Ballali dhe kolegët e tij shfrytëzuan rastin në ceremoninë e ndarjes së çmimeve Oscar për të ndërgjegjësuar botën për padrejtësitë dhe spastrimin etnik të popullit palestinez.
Basel Adra, një tjetër regjisor i dokumentarit “Nuk ka tokë tjetër”, tha në ceremoninë e çmimeve Oscar: “Ne i bëjmë thirrje botës që të ndërmarrë veprime serioze për të ndaluar padrejtësinë dhe spastrimin etnik kundër popullit palestinez. Rreth dy muaj më parë u bëra baba dhe shpresoj që vajza ime të mos jetojë ashtu siç jetoj unë aktualisht dhe të kalojë të njëjtat përvoja”.
Incidenti ndodhi vetëm tre javë pasi dokumentari fitoi një çmim Oscar dhe pasqyron reagimin e ashpër të Izraelit ndaj çdo përpjekjeje për të ekspozuar krimet e regjimit. Shoqata Ndërkombëtare e Dokumentarëve (IDA) dhe organizata të tjera të të drejtave të njeriut kanë kërkuar lirimin e menjëhershëm të Ballalit dhe informacion për gjendjen e tij.
Në deklaratën e IDA-s thuhet: “Familja e Ballalit dhe mbarë komuniteti duhet të informohen për gjendjen, vendndodhjen dhe arsyen e ndalimit të tij”.
Republika Islamike e Iranit gjithashtu e ka dënuar ashpër këtë veprim të sionistëve dhe e ka konsideruar atë një shembull tjetër të politikave agresive të regjimit sionist. Mediat e Boshtit të Rezistencës e kanë interpretuar këtë veprim si një përpjekje të regjimit sionist për të shuar zërin e së vërtetës dhe Rezistencës.
Megjithatë, burimet e lajmeve njoftuan të mërkurën se Ballali dhe dy palestinezë të tjerë të arrestuar u liruan me kusht të martën pasdite dhe u transferuan në një spital palestinez për mjekim.
Vlen të theksohet se pas publikimit të lajmit për arrestimin e regjisorit palestinez, një peticion i firmosur nga më shumë se 3700 persona kërkonte lirimin e menjëhershëm të tij.
Në letër theksohej: “Trajtimi i tillë i një regjisori të njohur ndërkombëtarisht cenon rëndë lirinë artistike, të drejtat e njeriut dhe lirinë e shprehjes. Ne bëjmë thirrje për ndërhyrje të menjëhershme për të garantuar sigurinë e Ballalit, lirimin e menjëhershëm të tij dhe lejimin e tij që të takohet me familjen dhe avokatin e tij”.
Roger Ross Williams, Alex Gibney, Christine Vachon, Liz Garbus, Ezra Edelman, Dan Cogan, Kristi Jacobson, Julie Goldman, Lee Hirsch, Joslyn Barnes, Fisher Stevens, Dawn Porter, Rory Kennedy, Yance Ford, Laura Nix, Marjan Safinia, Julia Bacha, Simon Kilmurry, Jean Tsien, Jehane Noujaim, Sandi Simcha DuBowski, Yoruba Richen, Lisa Valencia-Svensson, Ryan Werner, Sabrina Schmidt Gordon, Daniel Chalfen, Heidi Ewing, Maite Alberdi, Stephen Maing, Sonia Childress, David Teague, Susan Margolin, Ferne Pearlstein dhe Geralyn Dreyfuss ishin ndër nënshkruesit e këtij peticioni./KosovaPost/
