Liderët e grupit G7 ranë dakord se integriteti territorial, pavarësia dhe sovraniteti i Sirisë duhet të respektohen gjatë gjithë procesit të tranzicionit, raporton Anadolu, transmeton KosovaPost.
Gjatë një takimi virtual, liderët e Kanadasë, Francës, Gjermanisë, Italisë, Japonisë, Britanisë së Madhe, SHBA-së dhe BE-së diskutuan luftën në Ukrainë dhe situatën e fundit në Siri, pas rënies së regjimit të Bashar Asadit, bëhet e ditur në një deklarate të qeverisë britanike.
Duke diskutuar situatën në Siri, kryeministri britanik Keir Starmer tha se rënia e regjimit brutal të Asadit duhet përshëndetur, por “duhet të jemi të vetëdijshëm për atë që vjen më pas”.
“Prioriteti duhet të jetë siguria e popullit sirian, duke mbështetur një tranzicion politik që çon në qeverisje të besueshme, gjithëpërfshirëse dhe josektare në emër të të gjithë sirianëve”, thuhet në një deklaratë nga zyra e Starmerit.
Në deklaratë theksohet se të gjithë liderët ranë dakord se integriteti territorial, pavarësia dhe sovraniteti i Sirisë duhet të respektohen gjatë gjithë procesit të tranzicionit dhe në të ardhmen.
Këto komente, duke vënë në dukje integritetin territorial të Sirisë, erdhën në mes të pushtimit izraelit të zonës tampon në territorin sirian.
Menjëherë pas rënies së regjimit të Asadit më 8 dhjetor, ushtria izraelite pushtoi zonën tampon në Lartësitë e pushtuara të Golanit të Sirisë, menjëherë pasi kryeministri izraelit Benjamin Netanyahu njoftoi rënien e marrëveshjes së ndërprerjes së luftimeve të monitoruar nga OKB-ja.
Ushtria izraelite kreu qindra sulme ajrore kundër bazave ushtarake, stacioneve të mbrojtjes ajrore dhe shtabit të inteligjencës, si dhe depove të raketave me rreze të gjatë dhe të shkurtër dhe rezervave të armëve jokonvencionale në të gjithë Sirinë.
Bashar Asadi, lideri i Sirisë për gati 25 vjet, iku në Rusi pasi grupet kundër regjimit morën kontrollin e Damaskut, duke i dhënë fund regjimit të Partisë Baath, që kishte qenë në pushtet në Siri që nga viti 1963.
Duke folur rreth Ukrainës, Starmer tha se presidenti rus Vladimir Putin “nuk ka treguar asnjë shenjë dorëzimi” dhe se është jetike që të forcohet mbështetja për Ukrainën, për t’i vënë ata në pozicionin më të mirë të mundshëm për të ardhmen.
Në X, Antonio Costa, president i Këshillit Evropian, tha se ata rikonfirmuan mbështetjen e qartë për Ukrainën dhe diskutuan situatën në Lindjen e Mesme.
“Ne deklaruam përkushtimin tonë ndaj popullit të Sirisë dhe do të fokusohemi në mbështetjen e një tranzicioni paqësor dhe sigurimin e integritetit territorial, lirive fetare dhe mbrojtjes së pakicave”, vuri në dukje ai.
Costa shtoi se Gaza gjithashtu “mbetet në ballë të shqetësimeve tona”.
Izraeli ka nisur një luftë gjenocidale në Rripin e Gazës duke vrarë afro 44.900 persona, kryesisht gra dhe fëmijë, që nga 7 tetori 2023.
Gjykata Ndërkombëtare Penale (GJNP) lëshoi urdhrarreste muajin e kaluar për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me padi për gjenocid në Gjykatën Ndërkombëtare të Drejtësisë për luftën e tij kundër Gazës.
