Çmimet e naftës kanë rënë ndjeshëm, duke iu afruar niveleve të para fillimit të luftës mes SHBA-së, Izraelit dhe Iranit, pasi Uashingtoni ka lehtësuar përkohësisht sanksionet ndaj eksporteve iraniane të naftës në kuadër të përparimit të negociatave për paqe.
Nafta e tipit “Brent” zbriti me gati 2%, në rreth 76,4 dollarë për fuçi, niveli më i ulët që nga fillimi i marsit dhe afër çmimit prej 72 dollarësh për fuçi që regjistrohej para shpërthimit të konfliktit më 28 shkurt.
Rënia erdhi pasi Departamenti Amerikan i Thesarit lëshoi një licencë 60-ditore që pezullon sanksionet ndaj naftës iraniane, duke lejuar rifillimin e eksporteve drejt tregut amerikan si pjesë e marrëveshjes së përkohshme për armëpushim.
Zëvendëspresidenti amerikan JD Vance deklaroi se bisedimet me zyrtarët iranianë në Zvicër kanë krijuar një “bazë të mirë” për arritjen e një marrëveshjeje të qëndrueshme paqeje.
Uashingtoni dhe Teherani nënshkruan javën e kaluar një marrëveshje të përkohshme 60-ditore, e cila përfshin edhe rihapjen e Ngushticës së Hormuzit, rrugë detare përmes së cilës kalon rreth një e pesta e furnizimeve botërore me naftë dhe gaz.
Ndërkohë, tregjet financiare mbetën nën presion. Indeksi britanik FTSE 100 ra me 0,9%, ndërsa aksionet e “SpaceX” pësuan humbje të mëdha në bursën amerikane Nasdaq, dukenegativisht në sentimentin e investitorëve.
