Marrëveshja e arritur me Hamasin është një “hap i rëndësishëm” dhe i domosdoshëm për t’i rikthyer pengjet, tha të mërkurën presidenti izraelit, Isaac Herzog, në atë që ishte konfirmimi i parë zyrtar publik izraelit i marrëveshjes së armëpushimit dhe lirimit të pengjeve.
Herzog theksoi gjithashtu se zbatimi i saj do të sjellë sfida të mëdha, shkruan cnn.“Kjo nuk është një situatë e thjeshtë; është ndër sfidat më të mëdha që kemi njohur ndonjëherë”, tha ai.
Presidenti izraelit premtoi se do të kthente të gjithë pengjet, duke pranuar se Izraeli kishte “dështuar në detyrën e tij” për t’i mbrojtur ata.
Herzog kërkoi që njerëzit të tregojnë ndjeshmëri ndaj familjeve të pengjeve, përfshirë ata që janë “thellësisht të pikëlluar” nga marrëveshja, duke u shqetësuar se të dashurit e tyre nuk do të jenë ndër 33 personat që pritet të kthehen në fazën e parë.
Presidenti izraelit falënderoi kryeministrin, Benjamin Netanyahu dhe ekipin negociator, duke i ofruar mbështetjen e tij. Ai u bëri thirrje qeverisë dhe kabinetit ta miratojnë marrëveshjen kur ajo t’u paraqitet.
Herzog falënderoi gjithashtu ndërmjetësuesit Katarin, Egjiptin dhe Shtetet e Bashkuara, përfshirë presidentin e zgjedhur amerikan, Donald Trump dhe ekipin e tij.
Zyra e Netanyahut tha se kryeministri do t’i drejtohet publikut vetëm pasi marrëveshja të jetë “e mbyllur dhe e plotë”.
Ndryshe, marrëveshja duhet të kalojë fillimisht në kabinetin e sigurisë dhe më pas në kabinetin e plotë të qeverisë. Qeveria duhet gjithashtu të lejojë kohë për kundërshtarët e marrëveshjes që të parashtrojnë një peticion në Gjykatën e Lartë.
