Është publikuar nga Lëvizja FOL raporti “E drejta e fshirjes së të dhënave personale” (E drejta për t’u harruar), transmeton Kosova Post.
Raporti ka për qëllim vlerësimin e zbatimit të së drejtës për t’u harruar, njëkohësisht promovimin e kësaj të drejte tek qytetarët për shkak se e drejta për t’u harruar është e drejtë e re e paraparë në legjislacionin kosovar si dhe është temë e patrajtuar më parë.
Albana Hasani nga Lëvizja FOL tha se ky është raporti i parë i bërë lidhur me këtë segment të privatësisë.
“Kjo e drejtë ndërlidhet me të drejtën e individëve për të mos i përdorë të dhënat personale ku nuk ka interes publik, apo për të kërkuar që të njëjtat të fshihen, nëse nuk përputhen me qëllimin fillestar të publikimit të tyre. Pra, është e drejtë ngushtë me të drejtën e mbrojtjes së të dhënave personale dhe të drejtën e privatësisë”, theksoi Hasani.
Sipas saj, në vitin 2022 ka qenë vetëm një ankesë për përmbushjen e të drejtës për t’u harruar, ndërsa gjatë vitit 2023, ka pasur gjithsej 146 ankesa në lidhje me shkeljen e të dhënave personale në përgjithësi: 33 ndaj institucioneve publike ndërsa 113 prej tyre ndaj institucioneve private.
“Lëvizja FOL rekomandon që të gjithë qytetarët të cilët pretendojnë se u janë publikuar të dhëna personale nga institucionet apo kompanitë, të dhëna që nuk kanë ndonjë interes publik, apo që e kanë humbur qëllimin fillestar të publikimit të tyre, të kërkojnë nga ta që të njëjtat të fshihen dhe nëse të drejtat e tyre nuk realizohen, t’i drejtohen me ankesë Agjencisë për Informim dhe Privatësi ne mënyrë që ta përmbushin të drejtën e tyre”, theksoi Hasani.
Për herë të parë në mënyrë normative, e drejta për t’u harruar u rregullua më 27 prill të vitit 2016 ndërsa filloi të zbatohej dy vite më vonë.
Për shkak të rëndësisë që ka e drejta e fshirjes së të dhënave personale apo e drejta për t’u harruar u inkorporua në Kosovë edhe në Ligjin për Mbrojtjen e të Dhënave Personale që u hartua në përputhje me rregullore të Bashkimit Evropian (BE)./AA
