Ministri i Jashtëm i Pakistanit, Ishaq Dar, i tha parlamentit të mërkurën se Forcat Ajrore të Pakistanit rrëzuan pesë avionë luftarakë indianë, përfshirë tre Rafale francezë, duke përdorur avionë luftarakë kinezë J-10C.
Dar, i cili është gjithashtu zëvendëskryeministër, tha se forcat pakistaneze shënjestruan vetëm ato avionë indianë që hodhën ngarkesën vdekjeprurëse.
Ai po fliste para ligjvënësve pasi India kreu një sulm me raketa gjatë natës në Pakistan dhe territorin e administruar nga Pakistani në Kashmir, i cili, sipas Nju Delhit, kishte në shënjestër nëntë “lokacione terroriste”.
Një reagim zyrtar nga India ndaj pretendimeve të Dar-it për aeroplanët e rrëzuar nuk kishte mbërritur deri në kohën e publikimit.
“Forcat tona mund të kishin rrëzuar 10 deri në 12 avionë luftarakë indianë, por kishte urdhra të rrepta për të synuar vetëm ata që qëlluan me ngarkesën vdekjeprurëse”, tha Dar, duke shtuar se tre Rafale, një MiG-29 dhe një SU-30 u rrëzuan.
Ai vuri në dukje se një numër vendesh mike kishin kontaktuar Islamabadin pas përshkallëzimit, duke thënë: “Ambasadori kinez ishte në Ministrinë e Punëve të Jashtme në orën 4 të mëngjesit dhe ne ia përcollëm gjithçka atij si një vend mik.”
“Avionët luftarakë Rafale, të cilët janë shumë të lavdëruar, kanë dështuar plotësisht dhe pilotët indianë kanë dëshmuar të jenë krejtësisht të paaftë”, shtoi Dar.
Ushtria pakistaneze konfirmoi të mërkurën se të paktën 26 persona u vranë dhe 46 të tjerë u plagosën në sulmet me raketa indiane dhe zjarrin ndërkufitar përgjatë Vijës së Kontrollit, kufirit de facto midis dy vendeve.
Përshkallëzimi i ri midis fqinjëve të armatosur me armë bërthamore pasoi një sulm më 22 prill në vendpushimin turistik të Pahalgam, në pjesën indiane të Kashmirit, i cili vrau 26 persona.
India fajësoi Pakistanin për sulmin, duke pretenduar përfshirje ndërkufitare. Islamabadi i ka hedhur poshtë akuzat dhe ka bërë thirrje për një hetim të pavarur me mbikëqyrje ndërkombëtare.
Autoritetet indiane thanë se Nju Delhi kishte ushtruar të drejtën e tij për t’iu përgjigjur, për të parandaluar dhe për të penguar sulme të mëtejshme ndërkufitare./trt
