Kryeministri kroat Andrej Plenkoviq e ka përdorur fjalimin e tij në Asamblenë e Përgjithshme të Kombeve të Bashkuara për të kritikuar zhvillimet e fundit në Serbi dhe për të ngritur sërish çështjet politike në Bosnjë e Hercegovinë.
Duke folur për marrëdhëniet në Ballkan dhe perspektivën evropiane të rajonit, Plenkoviq u ndal te varrimi i Ratko Mlladiqit në Beograd, duke kundërshtuar nderimet shtetërore dhe ushtarake që iu dhanë ish-komandantit serb të dënuar për krime lufte.
“Nderimet ushtarake dhe shtetërore që iu dhanë Mlladiqit në Serbi ishin fyerje për viktimat e tij dhe për aktgjykimet e gjykatave ndërkombëtare”, deklaroi Plenkoviq.
Sipas kryeministrit kroat, një qasje e tillë bie ndesh me standardet dhe vlerat që lidhen me anëtarësimin në Bashkimin Evropian, ndërsa Serbia synon të avancojë në procesin e integrimit.
Në fjalimin e tij, Plenkoviq foli edhe për situatën politike në Bosnjë e Hercegovinë dhe për reformën zgjedhore. Ai tha se, sipas qëndrimit të Kroacisë, kroatët në këtë shtet vazhdojnë të mos kenë përfaqësim politik që ai e konsideron legjitim.
“Zgjidhja nuk është as ndarja, as dominimi. Zgjidhja është një reformë zgjedhore e menduar mirë, e cila mbron çdo qytetar, duke siguruar njëkohësisht rikthimin e parimit themelor të përfaqësimit legjitim politik të popujve përbërës”, tha ai.
Plenkoviq e lidhi çështjen e reformës zgjedhore me stabilitetin e Bosnjë e Hercegovinës dhe të rajonit, në një kohë kur vendi po i afrohet zgjedhjeve të ardhshme.
Një tjetër pjesë e fjalimit iu kushtua luftës në Ukrainë. Kryeministri kroat përsëriti mbështetjen e Zagrebit për Kievin, duke theksuar se paqja nuk duhet të nënkuptojë shpërblim për agresionin.
“Paqja nuk mund ta shpërblejë pushtimin dhe rimëkëmbja nuk mund të ndahet nga drejtësia”, tha Plenkoviq.
Ai foli gjithashtu për nevojën e reformimit të Kombeve të Bashkuara dhe veçanërisht të Këshillit të Sigurimit, me synimin që organizata të jetë më funksionale përballë sfidave të reja ndërkombëtare.
