Kryetari i Lidhjes së Socialdemokratëve të Vojvodinës, politikani serb, Nenad Çanak, deklaroi sot se personalisht mendon se Kosova është shtet i pavarur, transmeton Kosova Post.
“Çfarë kam për të njohur ose mos e njohur Kosovën. Unë mendoj se është një shtet i pavarur”, tha Çanak.
Çanak tha për televizionin serb “Happy TV” se ai mendon kështu personalisht, dhe se të gjithë serbët tjerë mund të binden për këtë gjë nëse ata shkojnë në Kosovë.
‘Shkoni në Kosovë dhe shikoni nëse është shtet i pavarur. Kosova ka policinë e vet, gjyqësorin e vet, iu përgjigj pyetjes së shikuesve”.
I pyetur nga gazetarët, ai tha se për shkak të këtij qëndrimi nuk e konsideron veten tradhtar.
“Nëse do të kishte një referendum në kohën e Galileos – nëse bota është një pjatë e sheshtë, 99 për qind do të mendonin ashtu, por kjo nuk do të thotë që bota është një pjatë, por që njerëzit mendojnë kështu”, tha Çanak, duke komentuar pikëpamjet mbizotëruese për Kosovën në mesin e qytetarëve të Serbisë.
Çanak tha se pas bisedimeve me kryeministrin e Kosovës, Albin Kurti, ai arriti në përfundimin se pikëpamjet e tij ishin “të vërteta në disa fusha, dhe në disa fusha konstrukte politike”.
“Nuk është krejtësisht bardh e zi. Por t’i mbyllësh sytë, të mos shohësh në mënyrë patriotike se si është realiteti, nuk është politikë e mirë”, tha Çanak.
Social demokrati Çanak, gjithashtu ka deklaruar se nuk kundërshton ligjin e Inzokos për penalizimin e mohuesve të gjenocidit.
“Unë e mbështeta ligjin” ka thënë Çanak./Kosova Post/