Presidenti rus Vladimir Putin sugjeroi sot administrimin e përkohshëm për Ukrainën nën kujdesin e OKB-së, me qëllim organizimin e zgjedhjeve “demokratike” dhe më pas negocimin e një marrëveshjeje paqeje me autoritetet e reja, sipas “France 24”.
“Ne, sigurisht, mund të diskutojmë me Shtetet e Bashkuara te Amerikes, madje edhe me vendet evropiane, dhe sigurisht me partnerët dhe miqtë tanë, nën kujdesin e OKB-së, mundësinë e krijimit të një administrate kalimtare në Ukrainë”, tha Putin gjatë një udhëtimi në qytetin veriperëndimor, Murmansk.
Nga ana e saj, SHBA-ja tha se qeverisja në Ukrainë përcaktohet nga kushtetuta dhe populli i saj, shkruan atsh.“Qeverisja në Ukrainë përcaktohet nga kushtetuta e saj dhe nga populli i vendit”, tha dje një zëdhënës i Këshillit të Sigurisë Kombëtare të Shtëpisë së Bardhë, kur iu kërkua një përgjigje ndaj deklaratave të presidentit rus Vladimir Putin që sugjeronte një administratë të përkohshme për Ukrainën.
