Presidentja e Moldavisë, Maia Sandu, paralajmëroi të martën se demokracia e vendit të saj po përballet me një “garë me kohën” përballë, siç tha ajo, përpjekjeve të Rusisë për të ndikuar zgjedhjet parlamentare të këtij muaji.
Në një fjalim në Parlamentin Evropian në Strasburg, Sandu tha se votimi i 28 shtatorit për të zgjedhur një legjislaturë të re me 101 vende do të ishte “zgjedhja më vendimtare” në historinë e vendit kandidat për anëtarësim në Bashkimin Evropian, raporton AP.
Sandu përsëriti akuzat e kahershme se Moska po zhvillon një “luftë hibride” të gjerë kundër Moldavisë — përmes dezinformimit, blerjes së votave, financimit të paligjshëm të partive dhe një morie taktikash të tjera — për të minuar zgjedhjet e ardhshme dhe për të penguar rrugën e Moldavisë drejt BE-së.
“Qëllimi i Kremlinit është i qartë: të kapë Moldavinë përmes kutisë së votimit, të na përdorë kundër Ukrainës dhe të na shndërrojë në një trampolinë për sulme hibride ndaj Bashkimit Evropian,” tha Sandu. “Nëse demokracia jonë nuk mund të mbrohet, atëherë asnjë demokraci në Evropë nuk është e sigurt.”
