Inspektorati Qendror i Punës ka reaguar pas aksidentit në një vendpunishte afër Rrugës A në Prishtinë, ku humbi jetën një punëtor dhe një tjetër mbeti i lënduar, duke bërë të ditur se subjekti ku ndodhi aksidenti nuk ishte inspektuar më parë, pasi punimet ndodheshin në fazën fillestare të ndërtimit.
Sipas njoftimit, aksidenti ka ndodhur gjatë montimit të një vinçi (krani) në vendpunishten e subjektit “Vëllezërit Asllani”.
Inspektorati ka bërë të ditur se subjekti në fjalë nuk ka qenë i inspektuar më parë nga Inspektorati Qendror i Punës, për shkak se punimet ndodheshin në fazën fillestare të ndërtimit, përkatësisht në fazën e realizimit të themeleve.
Sa i përket shkakut të aksidentit, Inspektorati thekson se në këtë fazë është ende herët të nxirret një konstatim inspektues, pasi natyra dhe rrethanat e rastit kërkojnë hetime dhe ekspertiza të mëtejshme për të përcaktuar shkakun e saktë të aksidentit, si dhe përgjegjësinë lidhur me zbatimin e masave të sigurisë dhe shëndetit në punë.
Sipas njoftimit, inspektorët e Punës kanë dalë menjëherë në vendin e ngjarjes dhe janë duke zhvilluar veprimet inspektuese në koordinim me institucionet kompetente.
Inspektorati Qendror i Punës u ka shprehur ngushëllime familjes, të afërmve dhe kolegëve të punëtorit që humbi jetën, ndërsa të lënduarit i ka uruar shërim të shpejtë.
