Me rastin e 30 Gushtit – Festës së Fitores së Republikës së Türkiye-s, në Rezidencën e Ambasadës Turke në Prishtinë është organizuar pritje zyrtare, transmeton Kosova Post.
Në këtë ceremoni morën pjesë ambasadori i Türkiye-s në Kosovë, ministra të kabinetit qeveritar, deputetë të Kuvendit të Kosovës, ambasadorë të huaj, kryetarë të komunave dhe përfaqësues të ndryshëm të institucioneve turke dhe vendore.
Ambasadori i Türkiye-s në Kosovë, Sabri Tunç Angılı tha se në këtë ditë nuk festohet vetëm një fitore ushtarake por, “kjo është një faqe e lavdishme në historinë moderne të Türkiye-s”.
Ambasadori tha se luftërat ia vlejnë vetëm nëse do të çonin në një paqe të drejtë.
“Pas luftës sonë të pavarësisë, ne negociuam dhe nënshkruam Traktatin e Paqes së Lozanës me fuqitë e mëdha të asaj kohe. Traktati i Lozanës vendosi kufijtë e njohur ndërkombëtarisht të Republikës së Türkiye-s dhe për rrjedhojë kombi ynë ishte bërë një anëtar i respektuar i familjes së kombeve”, theksoi Angılı duke shtuar se sot ky traktat mbush 100 vjet.
Ai tha se Dita e Fitores kujton se duhet guxim jo vetëm për të bërë një luftë të mirë në fushën e betejës, por edhe për të arritur një paqe të qëndrueshme në tryezën e diplomacisë.
Në fund të fjalës së tij, ambasadori Angılı lexoi edhe fjalën e rastit nga presidenti i Türkiye-s, Recep Tayyip Erdoğan.
Më 30 gusht, Türkiye shënon festën kombëtare Dita e Fitores, kushtuar fitores së madhe të arritur nga forcat turke pikërisht 101 vjet me aktivitete dhe programe të veçanta në mbarë vendin.
Së bashku me Ditën e Fitores, Türkiye sot feston edhe Ditën e Forcave të Armatosura./aa
