Dy shtetas britanikë u vranë teksa po tentonin një “evakuim humanitar” nga qyteti ukrainas Soledar, thuhet në një deklaratë të familjes. Chris Parry, 28 vjeç dhe Andrew Bagshaw, 47 vjeç, u raportuan të zhdukur më 7 janar mes luftimeve të ashpra midis forcave ukrainase dhe atyre ruse.
Makina e tyre u godit nga një predhë artilerie ndërsa ata po shpëtonin një grua të moshuar. Familjarët e 28 vjeçarit thanë se nuk e imagjinonin kurrë se do t’i thoshin lamtumirë kaq shpejt.
“Vendosja e tij vetëmohuese për të ndihmuar të moshuarit, të rinjtë dhe të pafavorizuarit atje na ka bërë ne dhe familjen e tij më të madhe jashtëzakonisht krenarë. Nuk e imagjinonim kurrë se do t’i thoshim lamtumirë Chris-it kur ai kishte një jetë kaq të plotë përpara tij.
Ai ishte një djalë i kujdesshëm, vëlla fantastik, një mik më i mirë për kaq shumë njerëz dhe një partner i dashur për Olgën. Ai e gjeti veten të tërhequr nga Ukraina në mars në orën e saj më të errët në fillimin e pushtimit rus dhe ndihmoi ata që kishin më shumë nevojë, duke shpëtuar mbi 400 jetë plus shumë kafshë të braktisura.
Është e pamundur të thuhet me fjalë se sa shumë do të mungojë, por ai do të jetë përgjithmonë në zemrat tona”, thuhet në deklaratën e familjes.
