Gjykata e Lartë të mërkurën mbështeti kompetencën e një gjyqtari federal për të urdhëruar administratën Trump t’i paguajë 2 miliardë dollarë kontraktorëve të Agjencisë së ShBA-së për Zhvillimin Ndërkombëtar, por nuk kërkoi pagesë të menjëhershme.
Duke vepruar kështu, gjykata me një votim 5-4 hodhi poshtë një kërkesë urgjente të paraqitur nga Departamenti i Drejtësisë pasi gjykatësi i qarkut të ShBA-së, Amir Ali nxori një sërë vendimesh që kërkonin nga qeveria të shkrijë fondet që Presidenti Donald Trump i vuri në pritje me një urdhër ekzekutiv, raporton “NbcNews”, transmeton Klankosova.tv.
Gjykata e shtyu veprimin për këtë çështje për një javë. Ndërkohë, kontraktorët nuk janë paguar.
Në një urdhër të panënshkruar, gjykata tha se afati i gjykatësit Ali për pagesën e menjëhershme tashmë kishte kaluar dhe çështja tashmë po procedohet në gjykatën e qarkut, me vendime të tjera që do të vijnë. Një seancë dëgjimore është caktuar për të enjten.
Qeveria kishte thënë se nuk ishte në gjendje të përmbushte urdhrin e gjyqtarit Ali në fillim të kësaj jave që pagesat prej 2 miliardë dollarësh të bëheshin deri në mbrëmjen e së mërkurës së kaluar.
Projektet specifike të prekura nga ngrirja e pagesave përfshijnë instalimin e stacioneve të reja të ujitjes dhe pompimit të ujit në Ukrainë; përmirësimet e ujësjellësit në Lagos, Nigeri; furnizimi me pajisje mjekësore në Vietnam dhe Nepal; dhe masat për të luftuar malarinë në Kenia, Ugandë, Gana dhe Etiopi.
Në ndërkohë, administrata ka punuar furishëm për të rishikuar të gjitha shpenzimet ekzistuese të USAID-it. Së fundmi administrata arriti në përfundimin e këtij vlerësimi, duke konfirmuar një vendim për të shkurtuar mijëra programe – pjesa më e madhe e aktivitetit të agjencisë – me vlerë deri në 60 miliardë dollarë.
Edhe këto veprime janë vendosur të kundërshtohen, por nuk ishin në diskutim në Gjykatën e Lartë.
