Presidenti i SHBA-së, Donald Trump, tha sot se bisedimet e paqes Rusi-Ukrainë në Turqi këtë të enjte janë “shumë të rëndësishme”, duke shtuar se ai mendon se “gjëra të mira mund të dalin nga ai takim”, raporton Anadolu, transmeton KosovaPost.
“Takimi i së enjtes me Rusinë dhe Ukrainën është shumë i rëndësishëm”, tha Trump gjatë një konference për shtyp. “Unë isha shumë këmbëngulës që takimi të zhvillohet”, shtoi ai.
Udhëheqësi i SHBA-së shprehu optimizëm për rezultatet e mundshme, duke thënë: “Mendoj se gjëra të mira mund të dalin nga ai takim”.
Trump theksoi koston njerëzore të konfliktit të vazhdueshëm, duke e përshkruar luftën si “të dhunshme dhe të egër”.
Ai kërkoi t’i jepet fund “gjakderdhjes së tmerrshme”, duke theksuar se ushtarët “nuk janë ushtarë amerikanë”, por qenie njerëzore “që vriten në nivele që nuk i kemi parë që nga Lufta e Dytë Botërore”.
Bisedimet e paqes janë planifikuar të zhvillohen në Stamboll, Turqi, me presidentin ukrainas Volodymyr Zelenskyy që ka pranuar propozimin e Moskës për të rifilluar negociatat.
Presidenti turk, Recep Tayyip Erdoğan, përshëndeti mbështetjen e homologut të tij rus, Vladimir Putin, për rinisjen e procesit nga vendi ku ishte ndalur në Stamboll, duke riafirmuar angazhimin e Turqisë ndaj përpjekjeve për paqe.
