Presidenti i Shteteve të Bashkuara të Amerikës, Donald Trump, shprehu dëshirën për një takim të afërt me presidentin rus, Vladimir Putin, me qëllim sigurimin e përfundimit të konfliktit gati trevjeçar në Ukrainë, që ka shkaktuar viktima të shumta dhe pasoja të rënda humanitare.
Në një deklaratë përmes një video-lidhjeje gjatë Forumin Ekonomik Botëror në Davos, Trump u shpreh me shqetësim për humbjet masive të jetëve dhe pasojat e luftës.
“Do të doja shumë të takohem së shpejti me presidentin Putin për ta përfunduar këtë luftë. Miliona jetë po humbasin, është një masakër”, tha ai. Sipas tij, është koha që të dyja palët të ndërmarrin hapa konkrete drejt një zgjidhjeje paqësore.
Trump rikujtoi gjithashtu premtimet e tij gjatë fushatës presidenciale, ku kishte deklaruar në mënyrë të përsëritur se do të arrinte një marrëveshje mes Ukrainës dhe Rusisë që në ditën e parë të mandatit ri presidencial. Megjithatë, këshilltarët e tij tani pranojnë se procesi i zgjidhjes së këtij konflikti është më kompleks dhe mund të zgjasë për disa muaj.
Presidenti amerikan theksoi se përpjekjet e SHBA-së për të siguruar një marrëveshje paqësore janë tashmë në proces, por ai refuzoi të japë detaje të mëtejshme.
“Duhet të pyesni Rusinë. Ukraina është e gatshme të arrijë një marrëveshje paqeje”, tha Trump kur u pyet për qëndrimin e palëve në konflikt.
Në vijim, ai kërcënoi se Rusia do të përballet me sanksione të reja ekonomike nëse nuk arrin një marrëveshje të shpejtë me Ukrainën për t’i dhënë fund konfliktit.
“Nëse nuk arrijmë një marrëveshje shpejt, nuk do të kem zgjidhje tjetër veçse të rris taksat, tarifat dhe sanksionet ndaj gjithçkaje që Rusia mund të shesë SHBA-së, si dhe vendeve të tjera që do t’i bashkohen”, pohoi ai, duke shtuar se SHBA është e vendosur të përdorë çdo mjet për t’i dhënë fund kësaj lufte.
Nga ana tjetër, Moska reagoi ndaj deklaratave të Trump duke theksuar se është e gatshme për dialog, por nënvizoi se çdo negociatë duhet të zhvillohet mbi bazën e respektit të ndërsjellë dhe interesave të përbashkëta.
Kjo deklaratë lë të kuptohet se, pavarësisht sfidave, ekziston një hapësirë për bisedime mes dy vendeve për zgjidhjen e konfliktit.
Kjo situatë mbetet një çështje komplekse gjeopolitike, ku diplomacia dhe interesat strategjike do të luajnë një rol vendimtar për arritjen e një zgjidhjeje të qëndrueshme dhe përfundimin e luftës në Ukrainë, shkruan Abcnews.al.Ndryshe, Rusia nisi pushtimin e shtetit ukrainas më 24 shkurt të vitit 2022 duke shkaktuar mijëra viktima dhe dëme të shumta materiale.
